Tiwlafin. Lberǧ Buεririǧ: mmuten kraḍ n yemdanen deg uṭṭerḍeq n yiwen n wexxam

Kkren-d yimezdaɣ n taddart n 5yulyu ass-a 7 yibrir 2022, ɣef 9: 35 n tnezzayt, di tɣiwant n Lberǧ Buεririǧ, s ṣṣut i ten-yessrehben nezzeh. Ayagi imi, yeṭṭerḍeq yiwen n wexxam deg taddart-a, ɣef sebba n lgaz n temdint (CO) i yellan iteffeɣ-d seg yijeεbuben i as-gan war ma rran-d s lexber.

I yisalli, ɣef leḥsab n yisallen n Uḥuddu aɣarim, i yellan dinna segmi i d-yeḍra uxeṣṣar-a, abeεεzeq-a yegla s terwiḥt n kraḍ n yemdanen, gar-asen taqcict i yesεan azal n 10 n wayyuren kan. Am akken i jerḥen ar tura azal n 16 n yemdanen nniḍen.

Rnu i waya, axxam-nni yeɣli-d s lekmal, yerna yegla ula s yexxamen n kra n yemεacren i yettwaḥuzan daɣen.

Yuɣ lḥal, ula d kra n tkerruṣin i yellan berra ur slikent ara. Acku, ɣef leḥsab n tnagiwin n kra n yimezdaɣ n temnaḍt-nni, aṭṭerḍeq-a d win yeqqwan nezzeh.

Ad d-nesmekti belli, ddeqs n twaɣiyin i d-yettilin, timentilin-nsent d lgaz-agi n temdint (CO), ama d axnaq, neɣ d aṭṭerḍeq. Γef waya dɣa, i d-yewwi ɣef yal yiwen ad yettḥadar lgaz-a deg wexxam-is, ur iɣeffel ara fell-as.