(Tiwlafin).At Smaεel: yettwaldi i tikkelt tamezwarut wadeg i turart n warrac

D tigawt igerrzen nezzeh i yexdem yiwen n yilemẓi n tɣiwant n At Smaεel, i yettabaεen i twilayt n Bgayet. Ayagi imi, i ixemmem ɣef warrac n temnaḍt-a, yeldi-asen annar n wuraren, anda ara tturaren.

Adeg-a i d-yezgan di taddart n Tala Ɛṭa, rnu i wuraren yemxalafen i yesεa, deg-s ula d ibasanen n uεemmu. Daymi, i yefka tagnit i warrac n tɣiwant n At Smaεel, d tɣawanin i as-d-yezzin akken ma llan, i wakken ad uraren, ad zhun, w ad nnecraḥen.

D ayagi dɣa, i d-iswi n Mass Buqlada Nasim, win i igan aṣenfar-a.

Mass Buqlaḍa, yettwassen belli, d win iḥemmlen arrac, yettxemmimen fell-asen, d win yebɣan ad ten-iwali umren. Akken qqaren dɣa, d ccɣel-is i d anagi fell-as.

I yisalli, taɣiwant n At Smaεel, txuṣ nezzeh deg yiṣenfaren-a. Daymi dɣa, am warrac n tɣiwant-a, am wid n tɣiwanin-nniḍen i d-yezgan deg yidurar, ur ttafen ara deg wacu ara ssedhun iman-nsen. Ahat tuget n wakud-nsen, sεeddayen-t deg turart n ddabex n uḍar.

Ad d-nesmekti belli, adeg-a, yefka tagnit i warrac i wakken ad kksen ɣef ulawen-nsen. Ahat ayen i d-ijebden iwellih-nneɣ, d taḍṣa-nsen i yulin s igenni mara tturaren akken. Ad as-tiniḍ bedlen amaḍal n tudert, imi, tzemmreḍ ad teɣreḍ deg uzmummeg d taḍṣa-nsen tumert i yumren s uṣenfar-a.

Ula d imawlan seg tama-nsen, yehwa-asen nezzeh waya. Yuɣ lḥal, ula d nutni ad yefsus fell-asen lḥal, ad staεfun seg wuguren d tteqlaq i asen-xedmen warraw-nsen.

Di taggara, yewwi-d ad nebder belli, ibelleε-it ussan-a, i wakken ad t-yessewseε ugar.