Amawal n yinzan (Aḥric 1): issin 10 n yinzan seg temnaḍt n At Smaεil d yinumak-nsen
Deg yinzawal i d-yessuffeɣ Mass Sadeq Rebbaεi deg useggas n 2019, ugar n 800 n yinzan i sseqdacen deg temnaḍt n At Smaεel i d-yewwi deg-s, s usegzi d unamek-nsen.
Newwi-awen-d ass-a 10 deg-sen.
1) Abelluṭ n tacta, wala zzbun-ik ay ubexxa:
Qqaren-t deg tegnit ideg amdan agellil d win yettextirin tudert s sser d tfenṭazit wala tin n ddel; imiyeqbel liḥala-s akken tella xas txus, wala ad yeknu i bab n cci.
Zzbun: cci
2)Abendir aqdim, wwet neɣ qqim, anig ad t-teǧǧit di d-iqqim :
Yezmer yettuɣal-d deg tegnatin n uεayer d unqad ɣef umdan ur nesliḥ, d kra n tɣawsa. Neɣ ɣef win ideg ulac nnfeε, imi ad t-tafeḍ dima d win ideg ur yuɣ wara, acemma ur t-yesduqqus : ama d awal, ama d ayen-nniḍen
3) Abẓiẓ d gma-s n ujraḍ :
Yettwaway-d ɣef wayen yettemcabin. Amedya, tawacult n diri, yezmer kra n win i d-yefrurin seg-s yfttili diri-t. Yella deg tmetti taqbaylit, win i d-yeqqersen seg yihwah, ad yeqqimakken. Qqaren-t daɣ ɣef win yessesaden am ….ujraḍ.
4) A ccuha-m a taneqqact gar tneqcin, umma nekk aɣrum akan g uqelmun:
Yettwawtay-d ɣef umdan ameksul, neɣ ur nettgerriz lecɣal. Mi ara as-tesselmadeḍ, neɣ ad t-tettwessiḍ netta yugi ad yettḥesses, ad yeḥfeḍ. Yettusemma ur yessin, lεib fell-as mačči fell-ak.
5) Aceyyeε d areyyaε:
D awezɣi ad yettuqenneε wul-ik seg tɣawsa i ur yexdim neɣ ur yessaweḍ ufus-ik.
Akka i yemmug umdan, imi anig ur yeḥḍir ur tezmir ad tefru fell-as akken ilaq, deg wakud-is.
Anamek-is fiḥel ma tettekleḍ ɣef ḥedd i kra n uqeddic imi ur yettmagga akken ilaq ; da d amedya n usqeddem.
6)Achili tettruẓu-tt tagut:
Qqaren-t mi ara d-temlil tɣawsa tewεer d tayeḍ i as-izemmren. Qqaren-t medden daɣen ɣef welbeεḍ yellan yewεer neɣ yezmuhmur s tezmert-is. Acku akken yebɣu yili umdan yewεer, yella win i t-yugaren deg tezmert, amek tebɣu tili tegnit teqseḥ tella tin i tt-yessettuyen. Am deg umedya n bu tɣennant, imi amek yebɣu iɣennen walbeεḍ, yella win i t-yifen.
7) Acrak d lehlak:
Ttinin-t-id ɣef ucrak i d-igellun s yiɣilifen akked yimennuɣen gar sin, kraḍ, neɣ kra n yimdanen i yezdin taɣawsa.
Ahat taḥanut, d asenfar, neɣ d ayen-nniḍen. Imi tikwal ttilint teswiεin ideg akken yebɣu yili lḥal, win yeṭṭfen kra weḥd-s xir, fiḥel ma yecrek d wayeḍ. Acku yezmer ad yesεu iɣeblan, ad d-yeggri di nndama.
8) Acu d lleft d acu d zzɣeb-is :
Deg kra n tegnatin ideg amdan yettɣil yella umgarad gar tɣawsa-a d ta, gar ssenf-a d wa, neɣ gar umdan-a d wa, i as-d-yettawi wayeḍ inzi-ya. Am win i as-yennan kifkif-iten.
9) Acu i k-zzan ay agniṭ, al di iwfet d abecnanniṭ:
Yettwasseqdac mi ara yewḥel yiwen deg uḥebber ɣef usellek, netta tazwara ur iḥezzeb – ahat iɣil yessen – almi yfḥsel. Yettusemma iεemmed i wayen izemmren ad d-yili.
10) Afus-iw g texsayt, ma ur d ddhan, d iɣi:
Awal-a iweznen d win heddren medden mi ara ṭṭfen deg kra ideg tella lfayda. Am tuṭṭfa deg wid yesεan cci d lxir, imi ma ur yelḥiq ḥedd seg-sen aṭas, ad yelḥeq drus.