Issin 5 n wansayen n temnaḍt n At Ɛebbas

Anwa deg-neɣ ur nessin tamnaḍt n At Ɛebbas. Mara as-isell yiwen i wawal-a, ayen ara d-yerzun srid s allaɣ-is, d Tawes Ɛemruc, gma-s Lmuhub Ɛemruc akked Faḍma n At Mensur.

Tamnaḍt n At Ɛebbas tettwassen daɣen s lqelεa n At Ɛebbas, d adeg i mazal ar ass-a d inigi ɣef umezruy n temnaḍt-a yeɣɣentren.

Rnu i waya,  imezdaɣ n temnaḍt-a mazal ar ass-a ttfen deg laṣel-nsen akked wayen icudden i wansayen-nsen
Deg umagrad-a, neεreḍ newwi-awen-d semmus n leεwayed i mazal ar ass-a ṭṭfen deg-sent deg temnaḍt-a:

1) Amager n tefsut:

uqbel ad d-yelḥeq umenzu n tefsut, tilawin n At Ɛebbas ttheggint iman-nsent i ttiεad-a. Dɣa, teffɣent nutenti d warraw-nsent imecṭaḥ, ttawint myal lxir yid-sent. Am
Umeqful i d-ttheggint, ibawen iquranen, tiɣrifin, lesfenj.
Deg uḥriq icebḥen wessiεen, ttemyagarent tlawin d warrac i wakken ad bḍun gar-asen tumert d ucmummuḥ-nsen s umenzu n tefsut.

2) Xeddmen ifelfel aεebbas:
Ifelfel-agi umu qqaren ifelfel aεebbas, yella kan deg temnaḍt n At Ɛebbas, dinna kan i t-teẓẓun.
Mucuε s teqreḥ-is akked lbenna-s, d amectuḥ, d imdewwer.
Deg yimekli d yimensi n twaculin n At Ɛebbas, ifelfel-a d ur yettixir ara ḥalamma ifukk lweqt-is. D win yesεa amkan εzizen deg ulawen-nsen.

Dɣa mara d-yaweḍ unebdu, fessrent tullas n temnaḍt-a ifelfel-nni i yuɣalen d azeggaɣ i yiṭṭij, teǧǧant-t armi i yeqqur mliḥ, imir-n teddzent-t armi yuɣal d awren. D win i sseqdacent deg useggi-nsent n yal ass.
Zik, d win i xeddment deg umkan n ṭumaṭic.

3) lqeṣber n teskert:
Seg yisufar i sseqdacent tlawin nezzeh deg useggi-nsent,ttheggint-t deg uxxam. Asmi ara d-yaweḍ lawan n uẓẓu n lqeṣber, tiwaculin n At Ɛebbas ttakent amur meqqren i lqeṣber di tbeḥyar-nsent.Mara t-id-kksen, fessrent-t i yiṭṭij armi yeqqur, ttherrisent-t armi yuɣal d awren. Ssin akkin, ṣṣexlaḍent-as tiskert yeddzen d zzit n uzemmur.

4) Ttemyerfaden gar-asen:
Deg temnaḍt n At Ɛebbas s umata, igellil ur yettḥussu s yiman-is ixuṣ neɣ yettwaḥqer, acku zgan yimezdaɣ ɣer tama-s. Amedya, ma tella twacult tesεa amuḍin, ttemsefhamen gar-asen reffden-t. Wa ad as-d-yaɣ ddwa, wayeḍ ad yettawi-t ɣer sbiṭar, wid-nniḍen ttaken ayen umu zemmren n tedrimt.

5) Mazal ṭṭfen deg tuččit n zik:

Inebgi yerzan ɣer At Ɛebbas, ad iger tamawt dakken, d tuččit n zik ara as-d-sersen, am seksu s uyaẓiḍ, ameqful, taberkukust, tikerbabin, afḍir n uqessul, taḥbult n lmerqa, seksu n ubiṣar d wayen-nniḍen.
Ula deg tudert-nsen n yal ass, d ayen i d-ttheggint d tuččit tlawin-nsen. Γas ma yella d tawacult tamerkantit, lameεna tuččit n zik tezga tella.