Ula d kečč tneqqeḍ tutlayt-ik!

Ur ttwali ara kan ayen ixeddem winna, tettuḍ ayen txeddmeḍ kečč. Ur d-sseɣlay igenni ɣef yiwen ma yezgel taɣawsa, kečč acemma ur tebɣiḍ ad d-yeɣli fell-ak m’ara tt-tzegleḍ.

Ẓriɣ tesḥassfeḍ ayendin mi tettwaliḍ tutlayt-ik ur tesɛi amḍiq deg umaḍal, tesɛa-t kan deg yilsawen n wid-ik. Iban amḍiq-a d tasertit i as-tt-yekksen.

Ḥsiɣ daɣen aṭas i k-yettwalin d ameɣnas, imi tekkateḍ ala ɣef yidles-ik, tqeddceḍ i usnerni n tutlayt-ik. Ẓriɣ ɣas mačči d ameɣnas i telliḍ, tẓerreḍ iman-ik xersum tukiḍ gar kra n wayetma-k i tettwaliḍ ṭṭsen, txeddmeḍ ayen yellan fell-ak i uḥraz n yidles-ik.

Maca, ulama banent tamiwin i yekkaten deg tutlayt-ik akken ad tt-nɣen, wiss ma teẓriḍ ula d kečč, ɣas akken nniḍen, tneqqeḍ tutlayt-ik?

Ih, s unamek-is ma nniɣ-ak-d tneqqeḍ tutlayt-ik. Amek uhu netta aql-ik d aselway n tɣiwant, kečč ur d-tessufuɣeḍ ikwaɣḍen n tedbelt s tutlayt-ik, ur turiḍ tiplakin n yiberdan d yisɣuren s tutlayt-ik, ur d-tettaruḍ ilɣuyen s tutlayt-ik. Amek uhu netta tezgiḍ deg yiẓeḍwan inmettiyen, maca ur tettaruḍ s tutlayt-ik, ur tɛerḍeḍ ad tiliḍ gar wid yekkaten ad snernin tutlayt-ik. Tesnulfayeḍ-d din isebtar tettaruḍ s tutlayt i ur nelli d tutlayt-ik. Amek ur tneqqeḍ tutlayt-ik kečč tettuḍ-tt segmi tkecmeḍ timura n medden. Tesselmadeḍ i tarwa-k tutlayin tiwerdanin ur asen-teslemdeḍ tazwara tutlayt-ik. Yelha ma ssnen tutlayin, maca anda i k-yettuɣ ad tezwireḍ deg uselmed n tutlayt-ik seg wass amenzu mi d-lulen? Nniɣ-ak-d ula d kečč tneqqeḍ iles-ik!

Amek ɛni ur tneqqeḍ tutlayt-ik kečč aql-ik d amaru ala s tutlayin nniḍen. Tessidireḍ deg-sent teǧǧiḍ tayla-k tettmettat. Werǧin tekkreḍ ulama ad d-teslaleḍ adlis s tutlayt-ik ad tɛerḍeḍ lbenna tayiwent. Ula d kečč, i yellan zun d imeɣri, amek ur tneqqeḍ tutlayt-ik skud teɣriḍ ar tura acḥal n yidlisen s tutlayin tiyeḍ, ma s tutlayt-ik ur tegreḍ ad d-temlilem?

Nniɣ-ak-d aṭas i yellan yettban-d, maca yewɛer akken ad t-iwali yiwen. Tikwal s tɣawsa tamecṭuḥt, ma tebɣiḍ ad tebnuḍ abaẓar, ma tebɣiḍ ad t-thuddeḍ.

Γef waya, ɣas ẓerreɣ deg wayen yelhan i txeddmeḍ, eǧǧ-iyi ad ak-d-mleɣ kra i remqeɣ deg-k ur yelhi.

Nniɣ-ak-d ula d kečč s yisem-ik d aɣerman, aql-ik tneqqeḍ tutlayt-ik. Tneqqeḍ-tt acku tettleqqimeḍ deg yiberdan yal awal i yessengaren kra kra iles-ik, itekkes-as amḍiq. Werɛad tfaqeḍ ad tettmeslayeḍ kan tutlayt-ik akken ad tiliḍ d kečč. Ad tettmeslayeḍ taqburt d tmaynut. Taqburt iwakken ad yettwaḥrez wayen yellan, tamaynut akken ad tesnerniḍ tutlayt ad yuɣal umeslay-is d tannumi. “Tanemmirt” yella d aqbur kan ɣur Yimuhaɣ, ma ɣur-neɣ d amaynut yiwen n tallit akken. Maca tura, ula ɣur-neɣ yuzzel, yuɣal d aqbur. S wacu? S useqdec.

Aredmani, ad ak-d-iniɣ ay aserti, d kečč i d amezwaru i ineqqen tutlayt-ik ugar n wiyeḍ. Imi lemmer mačči akken, tili s tezmert i tesɛiḍ ad tefkeḍ seg waṭas-aya iẓiɣer idumen i tutlayt-ik, deg yal taɣult, deg yal aḥric. Lemmer mačči akken, tili wid ineqqen tura tutlayt-nsen, ad ilin sidiren-tt. Ma ur tt-ɣrin deg uɣerbaz d kečč i iḍelmen, mačči d nutni. Maca wissen ḥqa amek ɣef ugdud i k-iqilen, netta yettwali-k tneqqeḍ tutlayt-is? Ihi ula d netta yefka afus? Ay agdud, uggaɣ ula d kečč tneqqeḍ tutlayt-ik!

Mhenni Xalifi