Tadyant: Aḥric1

Wissen d aniwa i d amasay ɣef wayen i as-yeḍran, neɣ ɣef wayen i tettidir ass-a. Wiss menhu i as-yeldin allen i tedyant-a armi dayen tessemɣi acciwen, tesgem imeẓẓuɣen, tifrat-is teffeɣ-aɣ afus. Tadyant-nneɣ ara awen-nales ass-a d tin ur nban, d tin ur nesεi imal, tadyant-nneɣ teḍra i tin akken i nḥemmel zaεma, i tinna i aɣ-d-irebban, i aɣ-d-yessekren s lḥif d tmara, tga-yaɣ amkan gar yegduden-nniḍen. D nettat i aɣ-d-irebban ɣef nnif d tfenṭaẓit, i wakken ur nettili d iklan n wiyaḍ, ad neṭṭef deg lasel ɣas s yiwen n yiɣes d yiwet n tmiqwa n yidammen. I tihin i yesmetten irgazen d tlawin, tessefrurex, terba, tεebba, tcacca,  terfed ayen umu tezmer d wayen ẓẓayen armi tcenneq. Ass-a nekni nerra-s lxir-is akken ilaq, nebra i lasel, nebra i ṭṭbel deg waman, nessusem neṭṭaḍsa deg wudem n win i aɣ-irummen, nbeddel ula d nnekwa, nettserfiq i win i aɣ-d-yettaken aserfiq s wacu nettwijjiq.
Niqal tin akken ijemεen anezgum-nneɣ, nesnuzgum ula d nekni fell-as nettasem nettnaɣ nettεeggiḍ ɣef win ara d-iregmen isem-is.
Ass-a nekni nḍegger anezgum-is, nenneḍ nferreḥ s yes-s agnes n win ur necliε deg-neɣ, nessizdiɣ tazeqqa n win yesfuḥen afrag-nneɣ.
D taluft ay atmaten, d taluft i d-yessufuɣen nnhadi-nneɣ, i aɣ-igedlen nnefs yesfan. Ah buh i nnefs-nni i nesnuffus, yesfuḥ-aɣ imi, armi t-nettzemmim.
Werǧin tezdel tagut n usirem-nneɣ am tura, leεmer semmum lebsel n tudert-nneɣ ugar n waya, wanag neqqar wicqa, ahat tadyant-nneɣ azekka ad telhu. Ḥqa ula d asirem ur ilaq ad as-nebru, awi-d ukan ad tili talwit, yeggas ad nesummer tafukt n tumert-nneɣ.

Nnan-d yimezwura: iḍ ur yettuɣal d ass, idammen ur ttuɣalen d aman, asawen ur yettuɣal d tagnit. Ihi tadyant-nneɣ ur tban, ur tettbin, ur mazal ad d-tban tafat-is.

Sɣur : tafukt n yiḍ