TADYANT: Aḥric 2
A mmi qqim ɣur-i
Yeṭṭef-iyi lweḥc yeẓẓem-iyi
Ttxil-k a mmi wanes-iyi
Ugadeɣ i d-yeɣlin fell-i
A yemma a taḥnint-iw
Ur yelli d lebɣi n lebɣi
Kemm a yemma d tamurt-iw
Deg wakal-im mɣiɣ-d d imɣi
Ass-a gzu tadyant-iw, acku
D tadyant-im ula d kemmi
Tadyant-iw d tamεeyt n tayaẓidt izedlen ɣef tmellalin-is. Timellalin-nni d nettat i tent-id-yurwen yiwet s yiwet. Tettwaqreḥ, tettru, tesruḥ kra seg tezmert-is.
Fiḥel a yemma ad am-d-iniɣ, yak teḥsiḍ amek i tezga tesseḥbibir fell-asent, tqubel tafukt terna lehwa, tensa anida i tenwa d wanida i ur tebna.
Ahya yemma, yak d kemm i iyi-d-yeqqaren :
Tasa tezuɣɣur war tansa.
D tinna a taεzizt-iw yemma, d tasa-nni i tt-yettdemmiren Tettḥuddu ɣef tmellalin-is am tsedda. Tezga fell-asent d taεessast iḍ d wass war asgunfu. Ula d amihi tqubel-it akken yebɣu yili. Armi d ass i d-frurxen yicillawen-is. Ass-nni a yemma, yerna leεtab-is fell-asen ugar.
Trebba-ten armi mɣuren uɣalen zemren i yiman-nsen. Imir-n myal yiwen yeḍfer abrid-is, yebna tawacult-is.
Meεna a yemma, nekni nemgarad ɣef yicillawen-nni, nekni neǧǧa-kem war lebɣi ɣef yimal yelhan nettnadi.
D tamara a yemma, d tihin i aɣ-yerran, imi di tmurt-nneɣ ttaken azal i umerkanti bu usurdi.
Lexsas iger-aɣ-d irebbi seg myal tasga, idull-aɣ nekni ur nqebbel ad neɣli.
Mmi-m a yemma ur d asusam ur d agugam ɣef lḥeq-is, inettu am usennan deg uksum n win ara iεerden ad as-yegdel tilelli-s. Ccil akkagi i giɣ a yemma, di tmurt-iw ddreɣ akken nniḍen, ssusmeɣ ggugmeɣ war lebɣi.
Ah buh a yemma, mačči deg-m kan i nesmeḥ, ula d abrid i neḍfer yessawen yeččur d isennanen, zzint-as-d tregwa n yidammen.
Meεna nεemmed, awi-d ukan ad aɣ-d-banen yizeɣbuben n tafat dihin, saɣel i yilel.
Werǧin tmed tumert n win yunagen i berra n wakal-is. Win yeǧǧan yemma-s baba-s tawacult-is d tmurt-is. Γas ad yaf iman-is di tmura-nniḍen, wanag taḥurriqt-nni n lxiq themmej deg-s, d tacuḥḥit a yemma, d tameḥḥaqt n leqriḥ i yessenzafen ul.
Di taggara, bɣiɣ kan ad am-d-iniɣ a yemma:
Suref-iyi imi ur ḍmineɣ ara
Ma yella yeggas ɣur-m ad d-uɣaleɣ
Ḥsu tayri-m ur iyi-tfureq ara
Γas ma d aɣrib ara mmteɣ.
Sɣur : tafukt n yiḍ