Taqsiḍt n snat n tistmatin

Akken i yella deg wawal, llant snat n tistmatin myeḥmalent nezzeh gar-asent. Cerkent kullec di ddunit, ama d ayen yelhan, neɣ d ayen n diri.

Imi tamectuḥt deg-sent d tamuḍint, uletma-s tameqqrant tbedd ɣer tama-s, tella-s d tafat n wallen, d afud n yiḍarren, d taεwint n yiḥulfan d laman, d tssraft n lbaḍna-s daɣen.

Taqcict-nni tamecṭuḥt tettmeslay ḥala ɣef tmettant-is, tesselḥaq-itt-id war lawan. Yuɣ lḥal, Tezga teqqar-as i uletma-s ḥeḍru-d ad mmteɣ, imi aṭṭan-iw yewεer.

Yiwen n wass di lexrif, tbedd teqcict tameqqrant sdat n ṭṭaq tettmuqul nettat d uletma-s i yiwet n tseṭṭa d wamek i tecbeḥ.

Tekker tmecṭuḥt tesseqsa-tt : acḥal n yiferrawen i d-yegran di tejra-ihin?
Ayɣer, i as-terra tmeqqrant.
Acku, ḥulfeɣ belli mara d-yeɣli yifer aneggaru deg-s, d win i d ass n tmettant-iw. I tenna teqcict tamuḍint.

Uletma-s tuḥnint tenṭeq s ucmummeḥ ɣur-s: ihi ilaq ad nfareṣ ussan i d-yegran akken ilaq, ilaq-aɣ ad nezhu, ad nefreḥ, ad d-nemyeḥmal ugar.

Zerrin wussan, taqcict tamecṭuḥt tettεessa  ifer aneggaru ara d-yeɣlin seg tseṭṭa. Yezri  lexrif, ɣlin-d akk yiferrawin n tseṭṭwa, ala yiwen n yifer di useklu-nni yeqqim yugi ad d-yeɣli.
Simmal ttεeddin wussan ifer mazal-it dinna, tettu teqcict-nni tamsalt n tmettant-is, ula d aṭṭan-is ur t-yecqi ara. Tettḥulfu i yiman-is tlehhu seg wass ɣer wayeḍ. Imi deg wallaɣ-is teckunteḍ deg usirem.

Asirem-nni, d uletma-s i as-t-yeẓẓan deg ttexmam-is s tegzi, imi mačči d ifer i yeqqimen dinna ur d-yeɣli ara, d ifer n uplastik i txaḍ i ṭṭejra-nni i wakken ur d-yetteɣlay ara.

Tagmat ɣur welbeεḍ d laman, ɣur wiyaḍ d taɣellist. Ula d anaẓur deg wawal-is yeqqar : <win ur nesεi tagmat meḥqur>. Akken i ḥnin yirebbi n tyemmat i teqwa tayet n tegmat, d lḥid ur yezmir yiwen ad ihudd, d asirem n tilin.
Agzul n wawal, tagmat d asirem,  asirem yessidir, ihi ḥadret tagmat.

Sɣur: tafukt n yiḍ