Bgayet: 8 n yemdanen i iruḥen d iseflan n tmes n tẓegwa

Γef leḥsab n yisallen n tenmehla n uḥuddu aɣarim n Bgayet, 8 n yemdanen i d amḍan n wid yemmuten ar tura seg tmes i inedren di tẓegwa n Bgayet. 7 deg-sen seg tɣiwant n Tuǧa, ma d wis ṭam yemmut di sbiṭar n Uqbu.

Yuɣ lḥal, times-a tegla-d ula s imejraḥ, dɣa yelḥeq wemḍan n wid ijerḥen ar 56.
36 deg-sen di sbiṭar n Xalil Amran i llan, 10 ṭṭfen-ten di sbiṭar n Udekkar, 10 nniḍen di sbiṭar n Leqser.

Ad d-nesmekti belli seg iḍelli ar ass-a ddeqs n yidigan ideg tender tmes di twilayt n Bgayet. Tiɣiwanin i teεna temsalt: Tuǧa, Melbu, Aweqqas, Tasexriwt ( acercur n Kefrida ), akked Leqser.

I yisalli, ama d imezdaɣ n tudrin, ama d iqeddacen n Uḥuddu aɣarim, ulac win yebran i yifassen-is. Gan ayen yellan fell-asen i wakken ad ssensen ijajiḥen n tmes-a. Lameεna ar tura mazal ur ssawḍen ad tt-ssexsin deg kra n yimukan am Tuǧa.
Nessaram ad yefru ugur-a s uɣiwel, am akken i nessawaḍ aεezzi-nneɣ i twaculin n wid yemmuten fell-asen talwit.
Ttḥadaret iman-nwen.