At Smaεel (Bgayet): tegdel tkebbanit taɣelnawt n trisiti d lgaz Sonelgaz trisiti ɣef kra n yimezdaɣ

Seld kra n wussan kan segmi i d-leḥqent tfakturin n ukraḍyur wis sin n useggas n 2023, ufan-d kra n yimezdaɣ n taddart n At Tεisiwt, taɣiwant n At Smaεel  iman-nsen war trisiti. Ayagi imi rzan-d yiqeddacen n tkebbanit taɣelnawt n trisiti d lgaz (itrisyanen) tanezzayt n wass-a bedemma akken ad gedlen trisiti ɣef kra n yimezdaɣ i ur nessaweḍ ad xellsen tifakturin-nsen.

Γef leḥsab n tnagiwin n yimezdaɣ, iɣermanen i yettusalasen di tedrimt ur asen-d-yewweḍ ula d lkaɣeḍ n usendeh neɣ n useεlem ɣef ugzam-a uqbel. Ula d ass-a llan wid ur nfaq belli tettwakkes-asen trisiti armi i yeffeɣ dayen yisalli. Wamma ur ten-sxebbren ara yitrisyanen uqbel.

D ayen i yeǧǧan dɣa imezdaɣ n temnaḍt-a rekkmen si zzεaf, acku ur yelli d lawan n tigawt-a. Γef usentel-a yenna-aɣ-d yiwen : « amek seg yiwet n tama agdudan yettnaɣ ɣef tudert, imi ur ufin ara medden d acu ara ččen. Seg tama-nniḍen ad aɣ-kksen trisiti. Tuget deg-neɣ ur xeddmen ara, rnu d lawan n unebdu, amdan yeḥwaǧ imsismeḍ, yessra i trisiti seg myal tama. Nutni ur aɣ-d-εellen ara ula d yiwet n teggurt i lexlas, rzan-d srid gezmen-tt » .

Niqal mmeslayen-aɣ-d kra n yimezdaɣ ɣef tfukturin i asen-d-yettelḥaqen, belli azal-nsent yugar nezzeh ayen i seddan nutni. Amedya d yiwet n twacult ur sεin tamacint n usired n iceṭṭiḍen, ur sεin abuḥray (climatiseur), seddayen kan yiwet n tiliẓri d kra n tlampulin. Meεna tafaktur-nsen taneggarut telḥeq armi d 13 000 n yidinaren.

Ihi ad nger tiɣri i tkebbanit n Sonelgaz s yisem n yimezdaɣ akken akken ad walin di taluft-a n tfakturin, rnu ad εellen kra n ttawil i twaculin-ayi imi nḍerrent nezzeh.