Adrar n Fad (Ayt Smaεel): tiɣri i tikkin di tfeska n ufexxar ansayan

Tger-d tdukkla tadelsant Adrar n Fad (ACAF) tiɣri deg usebter-is n facebook i wid yebɣan ad kkin di tfaska taɣelnawt n ufexxar ansayan di teẓrigt-is tis ṣa (7).

Tafaska-ya iswi-s amezwaru d aḥraz n yiwen seg wansayen igejdanen n temnaḍt n Ayt Smaεel ideg mazal ṭṭfent tlawin ar ass-a. Seg tama-tayeḍ iεeggalen n tdukkla Adrar n Fad am yal tikkelt, kkaten s leqdicat-nsen akken tisutiwin i d-iteddun ad lemdent ad refdent kra  icudden i tgemmi-nneɣ sɣur temɣarin.

Ihi i tin neɣ i win iḥemmlen aqennuc d rrqem fell-as, i wid iselben ɣef wansay n lebni d ucebbeḥ s yizamulen yeččuren d lemεani i d-yessunuɣ ufus d tεellamt, ttiεad-a d tagnit-nwen.

Ma yella d wid yebɣan ad kkin di temzizzelt, yessefk fell-asen ad ceyyεen sin n wallalen n ufexxar yemgaraden ɣer wexxam n tdukkla, ayagi send 15 ɣuct i d-iteddun. Rnu i waya imekki ilaq ad yesεu ugar n 18 n yiseggasen. Ili-ken ihi di ttiεad.

Afud igerrzen i tdukkla d wid ara yekkin.