Ttwawexrent kra n tmeɣriwin d tfaskiwin ilmend n ubaxix n tmes i iḥuzan Bgayet d twilayin-nniḍen

S udem i ibeddi ɣer yidis n wid i tḥuza tmes di twilayt n Bgayet, d kra n twilayin-nniḍen, d uxessar i d-tessegra ama di terwiḥin neɣ deg wayen-nniḍen. Refdent kra tamiwin i teεna temsalt rray belli ad ttwawexrent kra n temliliyin neɣ kra n tmeɣriwin i niqal ad ilint di taggara n wayyur n yulyu neɣ deg wayyur n ɣuct. Ayagi imi ulac deg-neɣ win ur ḥuzant tugniwin i ddren warraw n temnaḍin-a.

Amedya, tameɣra n Takfarinas deg usensu n Atlantis Akbu, i llan heggant i wussan n 7, 8 d 15 ɣuct i d-iteddun. Lameεna imḍebber n usensu-ya Mass Lunis Ḥamiṭuc i nessen am yal tikkelt, ibeggen-d ibeddi-s ɣer yidis n wid yenṭerren, ama s tigawt-a n uwexxer n tmeɣra, ama s uεiwen s ddwawi d yisufar-nniḍen. Dɣa yella seg yimezwura i asen-yefkan afus n tallelt.

Seg tama-nniḍen, tettwawexxer daɣen tfaska n uẓref deg At Yenni i niqal ad tili seg 27 yulyu armi d 5 ɣuct. Ula d nutni refden rray-a seld anejmuε akked usmil aɣiwan n tmeɣriwin. Rnu ɣer-s tafaska n tgemmi yulin deg Ɛin Lḥemmam di Tizi Uzzu i yetturaǧun ad d-tili seg 2 armi d 5 ɣuct 2023, tettwakkes.

Am akken i ttwawexrent daɣen tmeɣriwin n Muḥemmed Ɛellawa deg Iwaḍiyen akked Lani Rabeḥ deg Ukfadu.