Tajmilt : awal ɣef umedyaz-ameɣnas Yusef Deflawi

Ilul umedyaz Yusef Deflawi ass n 25 di meɣres deg useggas 1971. D mmi-s n taddart n Yiɛacuren, i yeṭṭafaren lɛerc n At Yemmel (taɣiwant n Tmezrit, agezdu n Bgayet).

Yekker-d am netta am yilemẓiyen n tudrin, irebba-t-d lḥif, tawacult-is tefren ad yekcem s aɣerbaz iwakken ad iɣer, ad yufrar. Alemmud-is deg uswir amenzu, d wis sin llan-d deg uɣerbaz amenzu, d uɣerbaz alemmas n taddart n “Lḥedd”. Mi d-yewwi akayaḍ n BEM yekcem ɣer tesnawit n teɣremt n Sidi-Ɛic, din i yebda amennuɣ ɣef tmagit d yidles n Yimaziɣen.

Yettimɣur tirga timɣurent yid-s, ɣas akken d aleqqaq ɛad yedda deg tikliwin n umussu delsan Amaziɣ -M.C.B, yekki deg waṭas n leqdicat idelsanen. Deg useggas n 1989 yewwi-d akayad-ines n LBAC, ldint-as-d tewwura n tesdawit, din tennerna tmussni-ines, tennerna leḥmala-ines ɣer kra n wayen icudden ɣer timmuzɣa d umennuɣ.

Di tesdawit tettunefk-as tegnit, yemlal-d d yilemẓiyen i ifudden idles, d tudert, din yekki deg tseqqamut n yinelmaden, akken daɣ i yekki deg tiddukla “Amazday Adelsan Inelmaden”, tuddsa-ya tlul-d deg ass n 19 di yebrir 1989.

Mi yekfa alemmad unnig, Mass Deflawi ur yebri ara i umennuɣ, maca ikemmel-it, yedda akken ddan imenza deg ubrid n yizerfan, d tlelliyin s umata.
Deg useggas n 2001, yekki deg uslal n snat n tdukkliwin di taddart-is, tamezwarut d “Tidukkla Tadelsant Tanekra”, tis snat d “Tidukkla Tamussni”.

Di taddart yezga yettnaɣ iwakken ad d-tseggem liḥala n yimezdaɣ, d win ur nɛeyyu mi ara d-yili kra n leqdic ama d adelsan, neɣ d inmetti.
Di tefsut taberkant am netta am Yiqbayliyen, tḥuza-t twaɣit i yeglan s yilemẓiyen, i yexlan ixxamen… Din ikemmel amennuɣ daɣen, yufa-t-id lḥal d aɛeggal deg umussu n Leɛrac, yufa-d iman-is d anekraf netta d yimeddukal-is.

Mass Deflawi d tmedyezt:

Ugar timmeɣnest, Mass Deflawi Yusef d amedyaz i yettarun iḍrisen ɣef: tmetti, tamagit, idles, taqbaylit, iɣeblan, d yizerfan, akken daɣ i yettara tijmilin i wid iwala uklalen. Yekki deg waṭas n tfaskiwin n tmedyezt i d-yettilin sya ɣer da, yettwanced ɣer tedwiliyin, d leqdicat idelsanen.

Deg useggas 2020 Mass Deflawi yessuffeɣ-d ammud-is amezwaru n tmedyezt, yefka-as azwel “Asirem n ugdud”. S yes-s yekki di tmesriyin yemgaraden n udlis.

Yeqdec armi i t-yewwi wass-is, ass deg yeǧǧa amaḍal-a, 31 yulyu 2023 ɣef tudert n 52 n yiseggasen. Yedda ṛṛuḥ-is di sbiṭar n Bgayet.

Sɣur Mmi-s n Yilel
02 ɣuct 2023