Tarzeft n ugraw n usegmi n tesnawit n Udekkar ɣer uẓekka n uselmad i iruḥen d asfel n tmes deg At Ksila

Ass-a 02/08/2023. Nekkni s yiselmaden, kra n yibalmuden d kra n yimahalen n Tesnawit Tasemsayt n Udekkar, nerzef ɣer twacult n umeɣras Mexṭar Igedlan i yemmuten ussan-a i iεeddan s tirɣi asmi tekker tmes deg temnaḍt-nsen.
Nerza akken ad ten-nsebber, ad ten-nwanes kra n teswiεt yerna nεedda ɣer tjebbant anda yettwamḍel akken ad as-nerr tajmilt.

Mi newweḍ ɣer uxxam-is d baba-s n umerḥum-nni i aɣ-d-iqublen, s wudem yennuɣnan, akked kra n yimaslaḍen n twacult-is. Neqqim yiwet n teswiεt n uskasi ɣef twaɣit i yewten tamnaḍt-nsen « At Mendil » akked tudrin i as-d-yezzin.

Deg uskasi-nni, mi yedda umeslay ɣef waya, gren-d kra seg wid iḥeḍren tamawt ɣef wayen ixuṣṣen ur yemmug ara acku lemmer mmugen yimahilen akken iwata ur tettiqsiḥ ara tegnit anect-nni.

Γas akken agri izad, akken nennum, maca ur neεdiz ara ad nruḥ ad nẓer aẓekka n umerḥum i d-yezgan deg leεli n temnaḍt iwumi qqaren « Tiẓiwar ».

Mi newweḍ ɣer tjebbant-nni sdat n thuski n tmeẓrit-nni, ɣas akken yewwet deg-s uxeṣṣar, nezzi-as-d i uẓekka-ines. Kra, mmeslayen-d ɣef wayen sεeddan d mass Igedlan asmi yella deg tudert-is deg uɣsur anda nxeddem. Anagar ayen lεali i d-yetteffɣen seg yimawen-nsen am unemhal n tesnawit-nneɣ mass Σacur Reḥmani am wid i t-ixulḍen mliḥ akked kra n tselmadin-nneɣ.
Baba-s, iḥḍer gar-aneɣ, nedεa-yas ad yesgunfu di telwit d rreḥma n Rebbi.

Deg lawan-nni, aṭas ur nezmir ad ṭṭfen imeṭṭi-nsen imi neḥṣa akkit dakken nesruḥ yiwen i d-yeǧǧan adeg-is d azedgan yerna d anesbaɣur.

Mass : Σabdennur Ḥamiṭuc.