Tadyant (aḥric5): Ih ula d nekkni nekka, ula d nekkni d imasayen ɣef wayen i nettidir

Wissen ma teqεed deg-neɣ kra tesreḍt neɣ wissen ma ibeddel kra deg-neɣ uɣerbaz?
Xuḍi am umeẓyan am umeqqran yal ass, nezmer ad d-nini, yekkat-itt ɣer yiwen seg-sen. Maca deg wallaɣ akken ttwaliɣ ur ibeddel kra deg-neɣ.
D imawlan zaεma i d timentelt n waya neɣ d nekkni i yugin ad nbeddel deg tikli-nneɣ?
Ur ḥsiɣ ara bɣan ayen iqwem yimḍebbren-nneɣ acku lemmer d tidet tili ibeddel kra tura, ur tettuɣal ara tmetti d tiẓgi timettit ( jungle sociale) deg wayen iḍerrun deg-neɣ.
Ur nettxemmim ula ɣef tdawsa-nneɣ. Leknis, yečča iberdan, iguduyen sdat n tmezduɣin, arway deg lebni, ur yelli leqder ula i ubrid aɣelnaw …
Mi ara nettmuqqul tiẓrawin i d-yesεeddayen Ldzayer n yiseggasen 1960, 1970, nettaf dakken imir-nni i twenneε tegnit wala tura. Imir-nni i yella uɣarim d aɣarim. Ssnen dacu i d leqder n wayen ara ḍefren deg tudert-nsen acku ḥsan imir-nni belli akken i d-yewwi ad ddun deg waɣir.
Ass-a, yal yiwen deg-neɣ d amasay ɣef wayen i d-yewwi ad t-ixdem maca skud serrḥen yimḍebbren-nneɣ i ddunit ad tehmel, azuḥ ur yetteqεad.
Tikli lεali tettas-d daɣen s tefrit, s leεqel kan. Tasuta ad d-tawi tayeḍ arma nufa-d iman-nneɣ nettu akk yir ansayen deg wanda nella ass-a.
Ldzayer, ass-a, tettwawet myiḥ deg wanect-a. Ruḥ anda i (am-)k-yehwa ur d-tettafeḍ adeg zeddigen anagar kra n tmeḍqatin i yettwaḥadaren imi ur bɣan ara ad amsent akken aberrani ara d-yasen ad as-wten aqerruy-is ɣer dinna. Ma d ayen-nniḍen ad yeqqim d ddecra kan i εemren yimeɣban n uqerruy neɣ n wallaɣ.
Ggten yimedyaten, walit kan Ldzayer tamanaɣt amek llan yigmamen-nni (quartiers) imeqqranen deg leryuf-is ad tegzum dakken ur yelli lebɣi sɣur yimḍebbren, ur ttettuyen yir tanumi yimezdaɣ n dinna : aṭeyyer n leknis seg yilemciyen, iεemmuren n wayen ṭeyyiren seddaw yizadaɣen-nsen (bâtiments) yerna ḥsan dakken mazal ttkemmilen (d aya i ireglen allaɣ), tiǧǧit n yiḍumman-nni akken acḥal d ussan uqbel ma usan-d ad ten-awin ….
Aya, akken nessen, yettawi-d yir aṭṭanen, tizit, lfuḥa …atg. yerna mazal ad ternu ad tiqsiḥ skud agdud yettwali d amagnu akk wanect-a yerna ur aɣ-tuqiε ara lmeεna.
“Mačči d tuccḍa-nneɣ, wid iwumi teεna temsalt ara iḥerrken”, Tiririyin-a, ttefɣent-d akk deg yimawen-nneɣ mi ara yili uskasi ɣef wanect-a. Maca d acu i nezmer ad t-nexdem ? Neεya nettwali ula deg wid i yettmeyyizen akken iqyem sεan yir ṭṭbiεat : aṭeyyer n cemma seg ṭṭaq n tkerrusin, timacwarin, ticekkarin n leknis ula ɣer tewwura n medden.
Amedya-nniḍen, walit tiwlafin-a i d-ṭṭfeɣ anda ara teẓrem wid i yesseknafen aksum dinna ččuren azwu s wabbu-nni (ddexxan). Aneggaru-ya, yesεa rriḥa qessiḥet yerna yal mi ara d-tεeddim syin-a ad ken-idiq nnefs, ad teskeḥkḥem, ula d allen-nkun ad ken-qerrḥent.
Maca aεbar (l’index) ad t-nsenni deg tezwara ɣer yimḍebbren i yessnen kan ad ṭṭfen isɣimen war ma wten ad beddlen tagnit, ɣer wid i d-yettmeslayen s tfenṭazit send tifranin ar deqqal ad ttun akk awalen-nni i d-ffkan i ugdud.
Acku awanek yemmug-d i tterbiyya ula d netta. Mačči d imawlan kan, iɣsuren iɣurbizen (établissements scolaires) i d-yessuffuɣen tisutiwin yelhan ; ula d awanek yezmer ad d-yernu tunṭict-is deg useggem acku yal yiwen seg-sen s tarrayt-is, yesεa amek i yettruḥu akken ad yaweḍ ɣer yiswi, d amasay ɣef wid i t-yerzan.

Σabdennur Ḥamiṭuc.
D aselmad deg Tesnawit Tasemsayt n Tɣiwant n Udekkar.

.