Akbu: ḥeḍru-d ad tebdu tfaska n umezgun arɣab amaziɣ

Seld tfaska n tmedyezt n yulyu yezrin i yesmurrsen akken ilaq, tettheggi tdukkla tadelsant ” Itri Adelsan n Uqbu ” s ufus n tallelt n tenmehla n yidles n waɣir n Bgayet akked tɣiwant n Uqbu i yiwet n temlilit-nniḍen s wazil-is. Tagi d tafaska n umezgun arɣab (amateur) amaziɣ di teẓrigt-is tis 14, ara yilin seg 20 armi d 24 ɣuct 2023, di tzeqqa n sinima n Uqbu.

Ilmend n ttiεad-a, d amsizwer ara yilin gar 9 n tikra ( troupes) n umezgun yemgaraden. Myal yiwet deg-sent ad tessken i tseqqamut n yinezzurfa d yemferrǧen taceqquft-is n umezgun.

I yisalli, taldayt tunsibt n tfaska ad d-tili ass n 20 ɣuct ɣef 16:00 n tmeddit.
Ma yella d aberreḥ ɣef yigemmaḍ ad d-yili ass aneggaru, 24 ɣuct seg 18:00 d asawen.

Ayen yessefraḥen ugar, d tasuta n yilemẓiyen i yellan deg yegrawen-a n umezgun. Daymi i nessaram ad uggtent  tfaskiwin am tigi, imi ttakent afud i warrac-nneɣ akken ad lḥun deg ubrid yelhan.

Ad tafem s wadda tawlaft n wahil unsib n tfsaka-ya d yismawen n tekra ara yekkin deg-s. Nessaram-asen afud igerrzen ama i nutni, ama i tdukkla tadelsant ” Itri Adelsan n Uqbu “.