Tamaziɣt deg uɣerbaz unnig n yiselmaden n yiεeẓẓugen igugamen

Yeldi uɣerbaz unnig i d-yessufuɣen iselmaden n yiεeẓẓugen igugamen aseggas 2022 deg Lezzayer tamanaɣt (tama n Bni Messus).

Iswi n uɣerbaz ad d-yessileɣ iselmaden ara yesselmaden ibalmuden n tesnawit ; wid ur nsell, ur nettmeslay. Aya yella-d imi llan yakan yiɣerbazen imenza (primaires) akked yiɣerbazen ilemmasen (CEM) n tewsit-a n yimdanen, maca ulac aswir n tesnawit.

Tamaziɣt tla amkan deg uɣerbaz-a, deg snat n temsizliyin llan yimukan i yinelmaden n tmaziɣt i yebɣan ad ilin d iselmaden n uzekka.

Deg useggas asdawan 2022-2023, anagar 04 n yinelmaden n tmaziɣt i yellan deg uɣerbaz-a unnig. Ma d aseggas-a i d-iteddun (2023-2024), 41 n yimukan i d-yeldin i yinelmaden n tmaziɣt ; akken i d-ldin akk i taɣulin-nniḍen.

Ass-a: 02 ctamber 2023 ffɣen-d yigemmaḍ n taggara, banen-d yinelmaden ara yilin deg uɣerbaz-a i useggas amaynu.

Aya d abaɣur i tmaziɣt, deg-s ad tekcem tmaziɣt deg taɣult-a, deg-s ad afen yinelmaden n tmaziɣt deg tesdawit abrid-nniḍen n ulmad, nnig n waya ad afen axeddim ugar.

Afud igerrzen i wid d-yufraren. Tudert i tutlayt-nneɣ.

Itri, 02/09/2023