Issin 10 n yiwellihen ara yesnernin tigzi d tḥerci n mmi-k

Ttcetkayen yimewlan iseggasen-a ineggura seg warraw-nsen nezzeh. Ayagi imi tasuta-ya n warrac temgarad ɣef tsutiwin i aɣ-yezwaren.

Ma nerfed-d amedya ɣef waya; arrac n zik rsen, ttaɣen awal, ur d wid yeffeɣ leεqel. Meεna lwacul n tura d anemgal; tuget deg-sen d iqlalaḥen, ur ttḥessisen ara, ttafgent akk tceṭṭiḍin-nsen, yerna tuget deg-sen sεan ugur n tittin.

Ahat ɣef leḥsab n tamawt i d-ttaken yemsujjiyen n tnefsit (psychologues), tamentilt n uddebdeb-a ɣur weqcic yezmer ad tili tcudd ɣer tjinitikt ( la génétique ), neɣ dayen i d-yewwi sɣur yimawlan-is. Akken i tezmer ad tili seg waddad n tudert-is i yettidir myal ass. Am yimennuɣen d leεyaḍ ma yella iḥedder-asen. Seg tama-tayeḍ, anezzeh deg usawal neɣ d turart deg-s, yesdebdib mliḥ allaɣ n weqcic amecṭuḥ.

Deg umagrad-a dɣa, newwi-awen-d kra n yiwelliḥen s turart ara ken-iεewnen akken ad ires mmi-k neɣ d yelli-k, ad ttaran awellih–nsen ugar i temsal.

1) Myal tameddit uqbel ad igen mmi-k, ḥku-as-d tamacut.

Azekka-nni ini-yas ad ak-tt-id-εawed i kečč neɣ i wayetma-s. Imir-n takatut-ines ad txeddem ugar.

2) Ur ttaǧǧa mmi-k ad inezzeh tiliẓri neɣ d aselkim s buhan.

Ur ilaq daɣen ad yennam anezzeh deg usawal s ttawil n internet. Ma yella inezzeh, mačči ugar n uzgfn n usrag i wass. Yerna zged zdat-s mmal-as netta ad igezzu.

3) Efk-as i mmi-k akud d tayri i as-ilaqen. Simmal yettaf weqcic ɣur yimawlan-is tayri d leḥnana, simmal ikesseb teflest deg yiman-is ugar.
Urar d mmi-k, ssendeh-it, ssɣer-it, mmal-as ɣef wayen akk ayen i as-d-yezzin.

4) Turart n useǧhed n tkatut :

Sεen-as-d i mmi-k semmus n tewlafin, ini-as ad yecfu fell-asent. Kkes deg-sent yiwet beddel-itt-id s tayeḍ. Ssuter-as i mmi-k d acu d tawlaft i tekkseḍ.

5) Ger mmi-k i uddal

Rnu i ubaɣur i yesεa i tezmert, addal yetturar nnuba tageεmirt deg usnerni n tegzi n mmi-k.

6) Ur teddu i mmi-k di lebɣi di myal taluft.

Acku imir ad yuɣal ur iferrez ara gar wayen i as-ilaqen d wayen i ur d-as-ilaq.
Issin amek ara ttqennεeḍ mmi-k, taywalt gar-swen d tifrat n wuguren.

7) Ssutur-as i mmi-k neɣ i yelli-k ad qeddcen yid-k.

Neɣ xersum sbeggen-as-d belli yetturar nnuba-s di tudert-ik, yesεa azal ula d netta di tmetti. Acku aqcic iḥemmel ad as-tessutreḍ taɣawsa, yettḥulfu belli meqqer.

8) Ssegzi mmi-k belli ur ilaq ad yegzem i yiwen awal, ur gezzem awal-is ula d netta.

Efk-as i mmi-k telelli i umeslay, ḥesses-as armi d taggara. S tikti-ya tzemmreḍ ad as-tesfehmeḍ belli ur ilaq ad yegzem awal n wayeḍ, neɣ ad iger iman-is deg udewenni gar sin. Ad yelmed asmuzget d tegzi.

9) Turart n usuneɣ neɣ n tira s uqmac n wallen

Seg wayen i irennun deg tegdi d trusi n weqcic, turart n usuneɣ n tɣawsiwin s uqmac n wallen. Amedya ssuter-as i mmi-k ad ak-d-yaru isekkilen x uṭṭunen s uqmac n wallen. Imir-n yewwi-d fell-as ad yesres allaɣ-is, ad ixemmem anagar ɣff tugna ara d-yessuffeɣ ma telha. D ayen ara t-yeǧǧen ad yerr awellih-ines i waya, ad yettu aqlileḥ.

10) S yisem-im d tayemmat, s yisem-ik d ababat yewwi-d fell-awen ad telḥum i warraw-nwen s tarrayt iwulmen.

Arraw-nwen d tamasit. Ihi ur tεeggiḍem fell-asen, ur tesεam azref ad ten-tewtem.
Mmi-k neɣ d yelli-k d lemri-ik kečč, ihi ttḥadar-iten.