Amawal n yinzan (Aḥric 2): issin 10 n yinzan seg temnaḍt n At Smaεil d yinumak-nsen
Deg yinzawal i d-yessuffeɣ Mass Sadeq Rebbaεi deg useggas n 2019, ugar n 800 n yinzan i sseqdacen deg temnaḍt n At Smaεel i d-yewwi deg-s, s usegzi d unamek-nsen.
Newwi-awen-d ass-a 10 deg-sen.
1) Ager tablaṭ i yigenni, ur teεlimet amek d-teɣli: Ttinin-t ɣef wayen yellan d uffir; ɣef lmektub, i d-yettwannay yinzi-ya. Yettusemmaakken ur teẓriḍ amek ara ak-d-teqqel teblaṭ seg yigenni, akken ur teẓriḍ amek ara yili uzekka, f wayen akk ara yeḍrun.
2) Ager taleqqimt almend n yimi-k, mačči d tin n d-icerreg imi-k: Ttinin-t i win yettḥuṣen deg wayen yellan d ayla n wiyaḍ alami as-d-yegla s txessart; d agmuḍ n ujεar-ines. Daymi ilaq yiwen ad yefren i yiman-is ayen ara as-iqidden d wayen umi yezmer.
3) Agged yiǧ, ul in-ttaggad ula merra: Ttinin-t i win yettagaden sidi-s, neɣ amdan am netta, imi d imḍebber fell-as neɣ d bab n tedrimt. Acku ilaq lxuf ad yili ala seg win aɣ-d-yefkan, imi d netta i d agellid ameqqran.
4) Agla-k d agla-k ma ur d-tewwi leḥnana, ad d-tawi nneεra: Ahat yennulfa-d ɣef win ur nessin d acu d azal n win yellan d aqrib-is; acku win i k-iqerben, neɣ ukud tezḍiḍ lasel, ur yettak fell-ak afus, ur k-yettaǧǧa deg teswiεin n ddiq ɣas ma temgaradem deg tektiwin.
5) Ahdam yeshel, lebni yewεer : beṭṭu d yihwah sehlen i uxeddim, din kan i tt-ssawaɣen war leεtab d ummeqleb, ma yella d zeddi akked lxir d usali n lecɣal yessra i xilla n uqeddic, xilla n yiɣallen d waṭas n leεtab daɣen, ɣef waya i d-ttawin inzi-ya.
6) Ahya zzin n lεerḍ ma d isfuḥet imi-k ɣef temɣart d taydit : D ameslay i tenna yiwet n temɣart zik i yizem akken ad t-tkellex mi yebɣa ad tt-yečč nettat d taqjunt i tella tessetbiε. Tura ttawin-t-id d inzi deg waddad mara yebɣu yiwen ad iwessi wayeḍ, ad as-yini ur xeddem aya d waya, neɣ ɣef flan, imi yettwali-t ur yuklal annect-n sɣur-s ɣef qeddac n tmentilin.
7) Aḥbib am lmusiba: ttinin-t i wakken ad d-sseknen dakken imdukkal d taluft εzizen, iweεren daɣen. Imi ilaq ad ten-tḥerẓeḍ s wassaɣen yelhan d uεiwen, yal wa seg tama-s, akken tebɣu tili tegnit.
8) Aḥbib-ik d lǧib-ik: Nezmer ad negzu srid anamek n yinzi-ya. Yettwaεqal belli yettwabdar-d ɣef wazal i sεan yedrimen deg tudert n umdan. Skud tikwal mi ara ttmeslayen sin, kraḍ neɣ ugar n yemdanen ɣef yir axaleḍ d yir assaɣ i yettilin gar wa d wihin, mi ara sḥissfen imi ulac tadukkli n lεali d uεiwen deg teswiεt n ddiq, smektayen-d dakken ur yelli win ara tafeḍ ala adrim i yettawi lǧib-ik. Dɣa, qqaren d nutni i d aḥbib n tidet, ala nutni d wayen tkessbeḍ iɣef yelha ad teserseḍ letkal.
9) Aḥbib-ik εeyyen-as, tesɣimet-as: Deg temxilḍa d wassaɣen i yettilin gar medden, ttilin-d uttεeddi d tuccḍa. Daymi mi ara yettwaεeyyen uxsim-ik, ma ur yeqrif, yeshel ad t-tewteḍ.
10) Aḥeddad yekkat, mmi-s ilemmed: Awal-a yettuɣal-d mi ara walin yiwen yewwi abrid n yimawlan-is, tugart deg wayen yerzan lḥerfat n ufus, neɣ d taẓuri, imi d tid yettruḥun seg baba-s i mmi-s, seg yemma-s i yelli-s, neɣ seg wa i wa.