Tameɣra n ccna n yibeddi s idis n unaẓur Axalaf

Tidukkla n Yidles d Sinima (A.C.C) n Tala Xaled (Aweqqas) tesuddes-d yiwet n tmeɣra n ccna n yibeddi s idis n unaẓur Ɛebdella Meεmac ( Axalaf ). Ttiεad-a ad d-yili ass n 06 tuber ɣef lxemsa n tmeddit di tzeqqa n sinima n temdint n Uweqqas.

I yisalli, ad kkin di tmeɣra-ya icennayen n temnaḍt n ssaḥel: Ferḥat Muḥli, Ayt Ḥsayen, Sifaks Yal, Ǧahid Ɛellal, Ḥafiṭ At Ɛli, Fayṣel Lεidi, Zayed Meεzuzi, Murad Ḥemmadi, Mas Ldi, d wiyaḍ.

Yuɣ lḥal tadrimt ara d-ikecmen seg-s, ad tili d afus n tallelt i unaẓur Axalaf, imi aneggaru-ya yettraǧu-t-id udawi ɣef wallen-is di tmurt n berra.

Axalaf d yiwen i iḥemmlen taẓuri, icennu, yettaru isefra, yettara-d i tiɣri n tdukkliwin tidelsanin, d bab n 04 n yiḍebsiyen n ccna. S unamek-nniḍen d bab n lxir s tnaga n medden akk, ass-a yessra ad as-nerr lxir-is.

Daymi i d-nger tiɣri-ya i medden irkelli iwakken ad d-fken afus n lemεiwna i unaẓur Ɛebdella Meεmac i yettwasnen s yisem ”Axalaf”.

Ha-t-aya d acu i aɣ-d-yenna uselway n tdukkla A.C.C Mass Rabḥi Ḥalim di tnaga-yis fell-as: <<Axalaf yezga yid-neɣ di leqdicat idelsanen, werǧin nessawel-as ur d-yerri ara i tiɣri, d amdan i yettawin taẓuri deg ul d wallaɣ…. ɣef waya, nekkni s yiεeggalen n tdukkla A.C.C nεewwel ad as-nerr lxir-is, ad nili ɣer yidis-ines di tegnatin-a n leḥris. Nettkel fell-awen ad tilim yid-neɣ s waṭas di tmeɣra-ya>>.