Tabraṭ-iw i kečč a Mhenni deg wass n tlalit-ik amezwaru dinna

Azul a GMA ƐZIZEN,
Wissen amek-ik ass-a deg uxemmuj-nni amcum?
Ẓriɣ ala iɣsan-ik i d-yeqqimen deg-k, ḥsiɣ am kečč am wid akk yeddan deg ubrid-ik, ur ken-yettcuḥu uweṭṭuf armi i ken-ifukk.
Ass-a d ass n tlalit-ik amezwaru ara tesεeddiḍ dinna, war tawacult-ik i izedɣen ul-ik d yidammen-ik. Tinna ɣef wacu terɣiḍ, tesseḥbibireḍ, tin akken i k-yecqan uqbel kullec.

Ḥsiɣ a gma εzuzu s yidis n Kaysa d Dadda Lewnis i telliḍ. Meεna zriɣ ur tecrihem ara akken iwata, acku nxus-iken, ur nelli ara yid-wen.

Ah a win ɣlayen, lukan ad ttwaliḍ nekni amek i aɣ-teḍra segmi truḥeḍ, tezdel tagut ɣef yigenni-nneɣ, tal tasga deg uxxam-nneɣ tneṭṭeq-d s yisem-ik, tal tanila d tawlaft-ik i yettwasunɣen deg-s. Amek ara ad nettu Ssut-ik aḥnin, awalen-ik yeččuren d leεqel, azmummeg-ik i ur nettfaraq udem-ik, sser d liser s wacu tettmagarad kullec, tifrat-ik i yal taluft neɣ d ugur i aɣ-d-imagren, teḥdeq d tekyes i tkesbeḍ.
Yal ass yeslalay-d yid-s ismektiyen-ik. Ur nezmir, ur nettizmir i lɣiba-k.
Yeqqim ssqef n wexxam-nneɣ d aεeryan, yedegdeg uqermud-is s rrwaḥ-ik a gma.

nezga d imeḥbas n lxiq, lxiq-nni ur nesεi tifrat.
Γas aktayen lεali i aɣ-icerken, ssifsusen fell-aɣ, besseḥ nugi ad nessusem ɣef kečč i aɣ-iruḥen. D asegna i d taduli n wussan-nneɣ, tenfa tumert s wulawen-nneɣ.

Suref-iyi a gma n tasa, zriɣ ur tḥemmleḍ asḥissef d ucetki, imi tkesbeḍ tabɣest d leεqel nnig tilas. Wanag ur yelli d nekk i d-yennan ayagi akkit, d ul-iw i d-ineṭqen, d aḥulfu n tegmat i aɣ-yezdin i yugin ad yesber.

Ḥsiɣ tettwissiḍ-iyi ɣef tebɣest di ddunit-a timεewwejt. Kečč iyi-slemden amek ara qableɣ kullec, amek ad iliɣ d tifrat i yal aεewwiq i yi-d-imugren. Ass-a zemreɣ i wuguren n ddunit akken ma llan, ḥala lɣiba-k.

Ayen akk i yi-d-temliḍ refdeɣ-t, kečč i yellan d gma, d amdakkel-iw, d aselmad-iw, d win lwaḥi cerkeɣ lbaḍna. D ababat-nneɣ wis sin, imi trefḍed tamasit-nneɣ tettuḍ iman-ik, terriḍ-t di rrif.
Γef waya i nugi ad nesber fell-ak, telliḍ-aɣ d tala n leḥnana, n tmussni, n yiwellihen, d tayri.

Ass-a bɣiɣ ak-d-iniɣ belli teddreḍ wa ad ttidireḍ i lebda deg wulawen-nneɣ, am kečč am Kaysa.
Ɛuhdeɣ-k a gma ur briɣ i yimenzayen-ik s wacu i telliḍ tettedduḍ. Ad defreɣ abrid-ik, ad sferfreɣ tiktiwin-ik, ad tebεeɣ lǧerra n yiḍarren-ik. Ad ssidreɣ asirem-ik, ad nnaɣeɣ, ad kemmleɣ i umennuɣ-ik.

Akken tenniḍ deg yiwet seg tezlatin-ik: << lliɣ yid-wen, ad iliɣ yid-wen ulamma ddaw n tmedlin>>.
Aql-ik yid-neɣ ḥacama d ass ara d-nernu ɣur-k, ḥemmleɣ-k a Menni-nneɣ, ḥemmleɣ-k leḥmala n yidammen, tin yessilqiqen ulawen. Ssaweḍ sslam i Kaysa d Dadda Lewnis.
Sgunfum di talwit a wid i nettεuzzu.

Uletma-k Sabbu i tettḥibbiḍ akken i k-tettḥibbi.