Tadyant (Aḥric6) : teḍra-aɣ am temεayt n Ǧeḥḥa d yiserfaqen-is

Mlalen sin n yemdukkal, yiwen deg-sen d amusnaw, d win yettnadin ad yegzu kullec. Wayeḍ yessen-as kan i zzux d nnefxa, yeččur d ameslay ur nettεedday ula seg uɣerbal.
Dɣa kecmen deg udiwenni, myal yiwen iḥekku-d i gma-s ɣef tmetti d wegdud ukud yettidir.

Yekker umusnaw-nni yenna-as : nekkni deg tmetti-nneɣ nettak azal nezzeh i tmussni, nettrebbi-d arraw-nneɣ ɣef leḥmala n tɣuri d unadi.
Imir-n yerra-yas umdakkel-is : nekkni agdud-nneɣ yettwassen s nnif d tirrugza, ulac win i aɣ-izemren neṭṭef deg wansayen-nneɣ. Ula d arraw-nneɣ nettrebbi-ten ɣef tirrugza d leḥmala n tnaslit.

Yenṭeq ɣur-s umusnaw: igerrez, meεna anda-tt akka tirrugza-nwen, sliɣ belli ifrax-nwen ččan-ten wuccanen sdat wallen-nwen, kunwi teṭṭallayem kan. Nniɣ-ak ay amdakkel, teḍra yid-wen am teqsiḍt-nni n Ǧeḥḥa d yiserfaqen-is, wissen ma tesneḍ-tt?
Xati, i as-yerra mmi-s n nnif.
Ihi ldi imeẓẓuɣen-ik: zik yekcem Ǧeḥḥa yeẓẓul di lǧameε, imi yekfa yeffeɣ-d ɣer berra, yufa-d iserfaqen-is ttwakren.
Yeqqim dinna sdat teggurt n lǧameε, yettεassa imeẓulla wa deffir wayeḍ, yegdel fell-asen rrwaḥ. Imi ten-id-yejmeε akk, yekker yenna-yasen: tura ad d-banen yiserfaqen-iw anwa i ten-yeggin neɣ ad geɣ ayen iga jeddi. Yeqqim yettεawad-asen-d i wawal-a s leεyaḍ d urfan.
Win yewwin iserfaqen tekcem-it-id tuggdi, yuzzel yerra-yas-t-id.

S tewnafit, steqsan-t yimeẓulla : d acu i yexdem εni jeddi-k a Ǧeḥḥa?
Yuɣ-d kan iserfaqen d imaynuten, i asen-yerra.

Yekfa umusnaw tamεayt-is, iger bu tirrugza nnehda, imi yegza srid izen n umusnaw.
Awal d lemεani.

Sɣur tafukt n yiḍ.