Taqsiḍt n tmeṭṭut tuḥrict d takna-s

Yella wi yellan armi tella yiwet n tmeṭṭut i yettwassnen s tḥerci d teḥdeq-ines. Γas ulamma di ssifa d talemmast kan ur tecmit maḍi, ur tecbiḥ maḍi, meεna di lecɣal, tezdeg, tamussni, tekyes, yiwet ur d-as-yezmir, tif tizya-s di kullec.
Argaz i as-d-isaḥen neɣ win i as-d-tefka twanza-s, ur yettwali ara ayen i txeddem, imi argaz-is d bu tlawin, yettwali tameṭṭut d tafekka, yettxemmim kan s lebɣi-s mačči s wallaɣ-is.
Ruḥ a zzman walli-d a zzman, argaz-nni i yellan ileḥḥu d yiwet n teqcict d tucbiḥt di ssifa, yerfed rray ad tt-id-yernu d takna. Dɣa iruǧa lawan ilaqen yenna-yas i tmeṭṭut-is belli atan yebɣa ad d-yernu fell-as takna, acku nettat ur tt-tqenneε ara.

S uzmummeg d war zzεaf i tqubel tmeṭṭut tukyist isalli-ya, dɣa tenna-yas ad isahel Rebbi.

Uqbel ad d-yaweḍ wass anda ara d-yawi wergaz tameṭṭut-is tis snat, tfares tmeṭṭut-is tamezwarut tagnit imi yella deg uxeddim, tuder ɣer ssuq tewwi-d sin n Lkiluyet n yiselman ( Lḥut). Imi d-telḥeq s axxam tger-iten deg yiteyyuten n yimeḥraben (iriduten) tbelleε fell-asen akken ilaq.
Tameddit-nni imi i d-yusa wergaz-is, tenna-yas : imi azekka ad d-tawiḍ tameṭṭut-ik, ad ruḥeɣ s axxam-nneɣ, ad ken-ǧǧeɣ i kra n wakud i yiman-nwen. Argaz abehlul yumer ayendin.

Azekka-nni yewwi-d takna n tmezwarut, yesεedda yid-s ass lεali. Armi d ass-nniḍen tebda tetteffeɣ-d rriḥa-nni n lḥut. Akken zerrin wussan i yettfuḥu wexxam.
Argaz-nni yesber d acu yesber, yemmeɣ s lehdur ɣef tmeṭṭut-is tamaynut, belli ur d tessizdig ara axxam-is armi ifuḥ. Nettat meskint seg mara ad d-tekker nettat d asizdeg acemma ur ibeddel.
Takna d wergaz-is zgan d amennuɣ, armi i tejmeε teqcict-nni tiqeccucin-is.

Imir-n iruḥ wergaz-nni ad d-yerr tameṭṭut-is tamezwarut, tugi-yas, tessuter-as tibrat.

Lḥara-nni tettfuḥu kan tettkemmil, dɣa yesres-itt wergaz-nni i lbiε yerna s ssuma irexsen mliḥ.
Tekker tmeṭṭut-is tamezwarut i yellan teffer kra n tedrimt tuɣ-itt.

Argaz-nni aṭemmeε, yesruḥ tameṭṭut tuḥrict, yerna tuzyint, yerna yeggra-d di berra war lḥara. Akka i tḍerru i win yesεan aεebbuḍ ameqqran.

Sɣur tafukt n yiḍ (S.X)