Tajmilt i unaẓur-amẓawan Rabeḥ Meriǧa

Ilul unaẓur Rabeḥ Meriǧa deg useggas n 1963, d mmi-s n temnaḍt n Yiberbacen i yeṭṭafaren assa agezdu n Bgayet. Rabeḥ am netta am tuget n yilemẓiyen n tudrin tiqbayliyin n tallit-ines, yekker-d di lḥif, imi tamurt akken kan tewwi azarug-ines. Din din yetterdeq ttraḍ-nniḍen si 1963-1965 i d-yeglan s tlalit n ukabar ”Tirni Iɣallen Inemlayen”.

Rabeḥ si temẓi-s iḥemmel aẓawan d wayen icudden ɣer tẓuri s umata. Γef waya, yekki deg wacḥal n yigrawen n ccna, yezga yettara i tiɣri n kra n terbaεt ara as-d-yessawlen s tumert.
Yuɣ lḥal anaẓur Rabeḥ i yettwassnen s yisem KURNIC (Korniche) i d-fkan yidurar n Yiberbacen d bab n lxir, d alsan (humaniste), ttɣaḍen-t yimdanen yenḥafen, ur iḥemmel leḥqer, d lbaṭṭel, yettili di twiziwin, yettekkay di leqdicat idelsanen anda ma llan. S ugzul n wawal, Mass Rabeḥ d win yesεan ul d azedgan am waman.

Rabeḥ Meriǧa d tigejdit n tẓuri deg Yiberbacen, yetturar aṭas n wallalen, yettqeṣṣir-ten akken iwata, acku d win yettruẓun aqerru-yis, d win iḥemmelen annar-a n tẓuri.

Ddeqs aya segmi yekki di terbaεt n ccna ”YEFSAN” . Taneggarut-a d tarbaεt n uẓawan i d-yezzin i waṭas n temnaḍin s ccna-yis atrar, tekki di tfaskiwin, d tmeɣriwin-nniḍen.

Di Montpellier yella yettheyyi netta d yimeddukal-is i waṭas n tmeɣriwin d yibarazen n ccna. Tameɣra tamenzut tεedda ass n 01 di dujember 2023, ma d tis snat niqal ad d-tili ass n 14 dujember di tzeqqa JAM Montpellier….Maca lmut teḥbes anaẓur. Dɣa gezmen-tt yemdukkal-is di rray d akken ad ḥebden ahil i d-wwin ad t-xedmen, imi yiwen seg yiεeggalen-nsen yedda yiziɣer-is.

Anaẓur-amẓawan ”Rabeḥ Mriǧa” yeǧǧa amaḍal-a, yedda yiziɣer-is deg wass n 12 dujember 2023 di temnaḍt n Montpellier ɣef teɣzi n 60 n yiseggasen.

Sɣur Mmi-s n Yilel
21 dujember 2023