Yennayer d wazal-is ɣur yimaziɣen

Yennayer, neɣ yennar, neɣ ixef useggas, akken i as-qqaren At Zik. Amenzu n Yennayer, d ass amenzu n useggas n Yimaziɣen, amezruy-is yebda segmi yesseɣleb ugellid Amaziɣ Cacnaq ɣef Uferεun n Tmurt n Maṣer deg useggas n 950 uqbel talalit n Ɛisa. Seg imir-n dɣa i yebda leḥsab n teswast (calendrier ) n Yimaziɣen. Ihi ass-a, leḥsab n ugdud Amaziɣ yeggeḍ ɣer useggas wis 2974.

Seg tama-nniḍen, taggurt n yennayer ɣur yimezwura-nneɣ, d tazwara n useggas n tfellahḥt. Daymi i sfelliten i ṣṣaba yelhan, ttmagaren yennayer s myal lxir, sfilliten i wayen n lεali. Ayagi, i wakken ula d netta ad asen-d-yebru i lbaraka-s, ad yelhu seg myal tama.

Ad d-nesmekti belli, Timura n Tefriqt ugafa akken ma llant sfugulent yennayer, ama d Lezzayer, Lmerruk,Tunes. Meεna, mgaraden wansayen seg Tmurt ɣer tayeḍ.

Ma neddem-d amedya n Tmurt-nneɣ Lezzayer, d wamek i ttmagaren yimezdaɣ-is Yennayer, llan kra n wansayen dduklen, llan wiyaḍ xati. Ihi myal tamnaḍt amek i tesεa tannumi tessnebgiw Yennayer.

Yuɣ lḥal, d amgarad-a i as-yernan ccbaḥa d sser i Yennayer.

Aredmani, akken ma llant twaculin, ttmagaren-t s ucmummeḥ d taḍsa. Niqal, zik ttbeddilent tlawin nners i yexxamen, ssizdigent leḥwari-nsent, ttcebbiḥent ttgerrizent iman-nsent. Ass-a ɣas ur ttbeddilent ssbiɣa i wexxam, meεna ttaɣent-d dduzan d tɣawsiwin icudden ɣer umezruy-nneɣ.

Am akken i tseṭṭilen i warrac imecṭaḥ icekkuḥen-nsen, neɣ ggaren-ten deg terbuyt n tẓiḍanin. Llant ula d ttimnaḍin anda i mazal ttawin arrac imecṭaḥ ɣer ssuq, gellun-d s uqerruy n wezger tetten-t.

Ma yella d tuččit, myal yiwen d acu i d-yettheggi ; seksu s uyaẓid, seksu n 7 isufar, seksu s ucedluḥ, berkukes, ameqful, tiɣrifin, tikerbabin, aḥlul, tisfenjtin, d wayen-nniḍen.

Nessaram-awen aseggas ameggaz.