Tadiwennit akked umedyaz-ameɣnas Ɛmeṛ Gasem
Di tdiwennit-a newwi-d awal akked umedyaz- amaru-ameɣnas n umussu asduklan d yimḍebber n uxxam n teẓrigin “Tanekra”, Ɛmeṛ Gasem.
Aɣmis Isaḥliyen : Di tazwara ini-d i yimeɣriyen anwa i d Ɛmeṛ Gasem ?
Ɛmeṛ Gasem : Ilul deg useggas 1964 di taddart n Tizi Mlal d izgan di tama n At Sedqa, taɣiwant n At Wasif. A.GASEM illa d aselmad n yigerdan deg uɣerbaz amezwaru, si 1982 armi d 2001.
Ibda yettaru deg useggas 1980, di tazwara d isefra kan, syin akin yuɣal yettaru ula d amezgun. Di 1988 yura tamezgunt-is tamezwarut i wumi isemma “Takurt tasemmaḍt”. Tamezgunt agi turar-itt terbaɛt n Tiddukla tadelsant Sliman Azem n Wegni Geɣṛan di 1990.
A.Gasem illa yettekka-d deg waṭas n tfaskiwin n tmedyazt i d-yellan di tmurt n yeqbayliyen. Aseggas n 1989 ittunefk-as warraz wis-sin di tfaska n tmedyezt i d-tettheggi tiddukla tadelsant Ṣumam di Bgayet. Deg yiseggasen-nni n 1990, yura daɣen kra n yeḍṛisen deg uɣmis “Le Pays-Tamurt” akked tesɣunt “Racines-Iẓuran”. Di 1994 A.GASEM netta d kra n yemdukkal-is akked warraw n taddart-is, slulen-d “Tiddukla tadelsant “Ḥmed Lemseyyeḥ”.
Deg yiseggasen-nni n 1990, yesnulfa-d netta d sin n yemdukkal-is, Naseṛ Frendi akked Ɛebdslam Frendi, Tarbaɛt n ccna ‘’Agrakal”. Tarbaɛt-agi tessufeɣ-d yiwet n tesfift ideg llant 06 tezlatin.
Seg 2001 ar ass-a, Aɛmeṛ Gasem yettidir di Fṛansa, anida yettkemmil leqdic-is deg ubrid n tira.
Di 2019 yessufeɣ-d ammud n yisefra “Izlan n tayri d tlelli” ɣer teẓrigin Sefraber.
Di 2020 yessufeɣ-d yiwet n tmezgunt i wumi isemma “Axxam iderwicen”. Di yunyu 2021 Aɛmeṛ Gasem yesnulfa-d Tiẓrigin TANEKRA. Si 2020 ar 2023, ar ass-a d amaray amatu n Tiddukla tadelsant “Asenfaṛ Adelsan Amaziɣ umaḍal” i d yesnulfa unaẓur Maǧid Sula di 2018.
– Amek i d-tufiḍ iman-ik deg unnar n tmedyezt ?
Ur ẓriɣ ara ma d nettat i d-inudan fell-i neɣ d nekk i inudan fell-as. Ẓrig kan d akken isefra imezwura i yuriɣ neɣ i d-nniɣ ad iliɣ ur ssawḍeɣ ara 14 n yiseggasen. Mi lliɣ qqareɣ deg uɣerbaz alemmas n Iwaḍiyen.
Di tazwara bdiɣ ttaruɣ isefra s tutlayt n taɛṛabt, ahat imi neɣɣaṛ ɣef yimedyazen yettarun s tmeslayt-agi kan. Maca ur ɛeṭṭleɣ ara uɣaleɣ ssefruyeɣ s teqbaylit. Imir-n lliɣ smuzguteɣ aṭas i Ṛadyu tis-snat, anida i sliɣ i kra n yimedyazen yettarun s teqbaylit am Muḥemmed Belḥanafi, Ben muḥemed, Si Ccrif neɣ kra n yicennayen am Lewnis akked Feṛḥat. Iban d wigad-agi i yewwin deg ubrid-nsen.
– Tesnulfaḍ-d axxam n teẓrigin di Fransa, amek i d-tella tikti n waya ?
I wakken ad d-ssufɣeɣ ayen i yuriɣ, mlaleɣ-d aṭas n wuguren ama di Fṛansa ama di tmurt. Di tazwara, ur llant ara teẓrigin i d-yessufuɣen idlisen s tmaziɣt maca asmi d-nnulfant mačči d ayen isehlen ad tafeḍ tin ara iqeblen adlisfus-inek…
Mi d wwḍeɣ ɣer Fṛansa di 2001 nniɣ-as ahat ad d-ldint tewwura maca uguren mačči d yiwen…deg useggas n 2019 ufiɣ-d tizṛigin Sefṛaber i yi-d-yessufɣen yiwen n wammud n yisefra “Izlan n tayri d tlelli”. Imi walaɣ amek ixeddem Julien Pescheur , anemhal n teẓrigin-agi, tekcem allaɣ-iw tekti n usnulfu n uxxam n teẓrigin. Maca ilaq-iyi ad lemdeɣ tusna n uḥric-agi. Deg useggas n 2021, asmi ssneɣ ciṭuḥ, bdiɣ seg yedlisen-iw nekkini akked wid n yimdukkal ur nekkat ara deg-i ma yella wanda ccḍeɣ gar-asen yiwen n udlis n Mass Neddaf Muqṛan. Tiẓrigin Tanekra ar tura suffɣent-d 07 n yedlisen.
Sin(02) yedlisen s Tefṛansist:
– Amezruy n tnekra n 1871 di Lezzayer, (Histoire de l’insurrection de 1871 en Algérie) de Louis RINN, Tanekra Éditions 2021
– Talakt mgal tisenneslemt (LAÏCITÉ VS ISLAMISME) 2022
Semmus (05) n yedlisen s Tmaziɣt (Taqbaylit):
– TAMURT IMEDYAZEN, tasɣunt n tmedyezt (sin wuṭṭunen, 2022, 2023)
– AFRIWEN YERẒEN (ungal), Ǧebran Xalil Ǧebran, tasuqilt n Rabaḥ Bucneb (2022)
– Amawal iɣersiwen s tewlafin ( Tafṛansist/Tamaziɣt), Nadir UDDAK , Fahima Urari , Massinissa Uddan (2023)
– Isuɣan n Tsusmi (isefra), Aɛmeṛ Gasem (Amar GACEM), 2023
-D acu n leqdic i d-tettheyyiḍ ɣer sdat ?
Tura akka, aql’aɣ nettheggi uṭṭun wis-kṛad n tesɣunt “Tamurt imedyazen” ideg i ttekkan 23 imedyazen. Ad d-teffeɣ di tazwara n useggas-agi ideg nella 2974/2024. Mi d-teffeɣ tesɣunt-a, ad nuɣal ad d-nessufeɣ sin n wammuden-nniḍen n tmedyezt.
– Idlisen i d-tessufɣem di Fransa ad d-ffɣen di tmurt ?
D wagi i d asirem-nneɣ ameqṛan, maca mačči d ayen isehlen. Ahat aseggas-a ad d-teffeɣ di tmurt tesɣunt “Tamurt imedyazen” uṭṭun wis-sin. S akin ad nwali ma yella wamek ara d-ffɣen yidlisen-nniḍen.
– Ahat yella tebɣiḍ ad theḍreḍ fell-as ur ki-d-steqsaɣ ara ?
Bɣiɣ ad d-iniɣ d akken isenfaṛen llan aṭas, tiktiwin ggtent, tirga ččuṛent-aɣ aqeṛṛu. Nezmer ad d-nessufeɣ idlisen, nezmer ad nefk afus n tallelt i yemyura ad d-ssufɣen idlisen-nsen maca ma d idlisen-a ur ttnuzun ara, neɣ ulac win ara ten-yaɣen, ad nuɣal am win ineqqcen deg waman. Aql’aɣ neḥwaǧ aṭas wigad ara aɣ-d-yefken afus akken ad nzen yedlisen. Win i iwalan iman-is yezmer ad aɣ-d-yefk afus n tallelt deg uḥric-agi n usfusker ad as-nini ansuf yis-sek.
– Awal n taggara swayes ara nessali tdiwennit-a ?
Bɣiɣ ad rreɣ tajmilt yakk i wid i yi-d-yettaken afus n tallelt gar-asen amdakkel-iw Ulɛid Arkat i yettilin yid-i di yal tagnitt di yal tallit. Am akken ara rreɣ tajmilt i yimedyazen d tmedyazin yettekkan di tesɣunt” tamurt imedyazen”.
Tanemmirt tameqṛant i ṛadyu tiziri i aɣ-d-yettaken awal di tesgilt “Imru n umedyaz” n Fazya Ḥefṣi.
Tanemmirt tameqṛant i kunwi i d-aɣ-yefkan tagnit akken ad d-nemeslay ɣef leqdic-nneɣ, teɣzi n tudert i uɣmis Isaḥliyen. Afud igerrzen !
Yesteqsat : Mmi-s n Yilel
