Murad Tuwak: timsizelt n ufran n teqcict icebḥen d tuccḍa tameqqrant

D tiɣri i d-iger umsujji n tnefsit ( psychologue ) Murad Tuwak i tdukkliwin i d-yesuddusen timsizlin n teqcict neɣ n uqcic icebḥen i wakken ad ḥebsen lecɣal yecban wigi, imi ttḍurrun nezzeh tanefsit n yigurdan imecṭaḥ.

Murad tuwak yessegza-d belli tidukkliwin tidilsanin i yesεan iswi d asɣenter n wahil n tmeɣriwin neɣ n temliliyin i xeddmen, neɣ ahat d tinirnit n kra d amaynut i wahilat-nsen, nutni deg ulawen-nsen d acmummeḥ ara d-rnun i teqcict neɣ i weqcic, war ma rrant-d s lexber belli d tugna (personnalité) n ugrud i tthuddun.
Di tilawt timsizlin-a snulfayent-d axnez(complex) deg tugna n uqcic, neɣ s unamek-nniḍen ttruẓunt tanefsit-is, ladɣa ma yella mačči d netta neɣ d nettat i d-yufraren.

Seg lawan-nni n lexsara, taqcict ad tettwali iman-is txus sdat n temdakkelt-is, d ayen ara tt-idemmren i wakken ad teḥqer iman-is. Ur teḥbis taluft da, wanag ad tuɣal ad tekreh taqcict-nni irebḥen, ad tettasem fell-as.
Aḥulfu n tismin d lɣec i yella weqcic neɣ taqcict ur t-ssinen ara, s temsizlin yecban tigi ad yuɣal ad t-yessin yerna ad yegmu deg-s. Taflest deg yiman i yella yekseb, ad tt-yesruḥ.

Mass tuwak iwekked-d belli agrud s umata mara yili meẓẓi, ur iqebbel ara lexsara, ɣas akken tebɣuḍ temliḍ-as, imi mazal ur ifehhem ara.
Daymi i ilaq ad nqader iḥulfan-is.

Seg tama-nniḍen, Mass Tuwak iger-d tiɣri n usḥulfu i yimawlan ɣef umihi n temsizlin yecban tigi i nezmer ad nerr deg umkan-nsent timsizlin n tmussni d usnerni n tektiwin deg wallaɣen n warraw-nneɣ. I wakken ad d-nesker tisutiwin yettaken azal i tmussni d tterbigga mačči i ccbaḥa n berra.

Di taggara Mass Tuwak yenna-d belli arrac-nneɣ akk cebḥen s nniya i ččuren wulawen-nsen, d ucmummeḥ ma neǧǧa-t deg udmawen-nsen.