Asfugel n umenzu n tefsut ɣur yiqbayliyen

Gar wansayen ideg ṭṭfent tudrin n tmurt Taqbaylit ar ass-a d asfugel n umenzu n tefsut neɣ amenzu n rrbiε akkin i as-qqaren di kra n temnaḍin.

Amager n tefsut d ansay n usfillet i lxir d wayen yelhan ǧǧan-t-id yimezwura-nneɣ, nerfed-it nekkni.
Zik ttmagaren tafsut s tumert, seld imi sεeddan ussan n tegrest qessiḥen, ussan n usemmiḍ d yideflawen, dɣa mara yeffeɣ lḥal ad d-tekcem tefsut zehhun wulawen ttnecraḥen am tefsut-nni i ttcebbiḥen yijeǧǧigen.

Γas ulamma iswi d yiwen d lferḥ d usfillet i wayen yelhan, meεna asfugel n umenzu n tefsut yemgarad seg temnaḍt ɣer tayeḍ. Ma nerfed-d amedya d Bgayet, Isaḥliyen sfugulen amenzu n tefsut s seksu d udergis.

Adergis d imɣi i yettilin di lexla, ɣas ulamma llan wid yeqqaren belli imɣi-ya yettḍurru amdan neɣ d agersiw imi ur yettwaččay ara, meεna imezwura-nneɣ ssnen-as amek i t-sseqdacen akken ad yili d ddwa.

Deg temnaḍt n yisaḥliyen, seld mara ad t-id-qelεen seg uẓar-is, tekksen-d iẓuran n udergis-nni ssiriden-ten akken awata, sserkamen-ten deg waman. Deg waman-nni irekkmen teggent-d tmellalin, ma yella d seksu sfewwiren-t deg tseksiwt s waman n udergis-nni, syin akkin mara ggent tmellalin-nni sseftutusen-tent di seksu-nni ttsemmiɣen-t s zzit uzemmur.
Γef leḥsab n lejdud-nneɣ imɣi-ya yelha nezzeh i tezmert, dɣa llan yettcuffu wudem-nsen mara t-ččen i tikkelt tamezwarut, qqaren dɣa d aṭṭan yellan deg-s i d-yessuffeɣ udergis-nni.

Ma di kra n temnaḍin-nniḍen am Ukbu, Sidi Ɛic, Iɣil Ɛli, xedmen tameqfult s yizegza neɣ tidal, zerrin-tt s tmellalin d tuftayin akked yiɣi.
Rennun seggayen ibawen iquranen daɣen.

Mara ad theggi tuččit ad ffɣent twaculin ɣer lexla akken ad sεeddint ass yelhan, dɣa ttnejmaεent cennunt zehhunt akken jmiε, ula d tuččit ttawint myal lxir. Arrac seg tama-nsen ččarayen tixecwula s tẓiḍanin. S ugzul n wawal, d ass igerrzen i sεeddayent twaculin.