Tiɣri i tikkin deg umsizwer uzzig n Dda Lwennas

Berrḥen-d yemḍebbren n yisebtar Imehbal, Asdawan akked Yiḥulfan ɣef tuɣalin n umsizwer uzzig n Dda Lwennas d tajmilt i Dda Lwennas Meεṭub, di teẓrigt-is tis ṭam.
Aberreḥ-a ssuffɣen-t-id iḍ iεeddan ilmend n usmekti n tmettant n umaru, amedyaz, ameɣnas, aneɣmas, anaẓur Mhenni Xalifi fell-as talwit n bab igenwan.
Tajmilt-a i Dda Lwennas, ad tili daɣen d tajmilt i yiman n sin n yimura Mhenni akked Kaysa Xalifi i iḥemmlen nezzeh Dda lwennas .

Ad tafem s wadda isallen akk ilaqen di tiɣri-nsen i d-gren. Afud igerrzen i wid ara yekkin.

Tiɣri:

Bḍut isalli-a ttxil-wat !

Tiɣri i i umsizwer uzzig deg teẓrigt-is tis ṭam!

I kunwi iḥemmlen Lwennas n Ayt Lewnis, ggaren-awen-d tiɣri yisebtar n wungalen Asdawan, Imehbal d Iḥulfan i umsizwer uzzig (concours spécial) deg teẓrigt-is tis 8, ilmend n usmekti arẓagan n tmenɣiwt n unaẓur d umdan igerrzen.

Amek zemreɣ ad kkiɣ?

Aru-d aḍris imserreḥ s tezwawt (taqbaylit), neɣ s walbaɛḍ n tutlayin timaziɣin nniḍen, ɣef Lwennas n Ayt Lewnis d umennuɣ i d-yewwi (am tejmilt) ur yettɛedday 25 n yijurriḍen tazneḍ-t-id ɣer tansa-a: asdawan2014@gmail.com.

M’ara ttwaktazlen yiḍrisen sɣur tesqamut n yinezzurfa i ara isennden ɣef semmus n yisfernan (tira, aḥulfu daxel uḍris, tikti tamaynut, taɣara n usenfali, aswir n tutlayt), kraḍ n yimezwura ara d-yufraren s yiḍrisen ifazzen, icebḥen, ad asen-ttunefken warrazen ɣef uqeddic-nsen. Daɣen zemren ad d-ffɣen yiḍrisen-nsen deg kra n yiɣmisen n teqbaylit!

Azemz aneggaru n uceyyeɛ d ass n 10 deg yulyu. Ma d igmaḍ ad d-ttwafesren ass n 30 deg yulyu.

Afud igerrzen!

« Ad aruɣ tutlayt-iw, ad rreɣ tajmilt i uzamul ».