Ussan-iw, ass wis sin

Ass-a, akken kan i kfiɣ učči n uɣrum s lmerqa ɣef wudem n ssbeḥ, yebra-yi-d jeddi Meqqran – aḥeqqa, bab n uxxam-a qqaren-as jeddi Meqqran. Yerna yebra-d i uɣyul-nni; netta ur t-ẓriɣ ara fkan-as yečča, dacu ẓerreɣ-t itett ayen i d-imeɣɣin ɣef tmurt, nekk ur ufiɣ ara lbenna deg wučči-ines. Aql-aɣ deg ubrid.

Jeddi Meqqran yeqqim ɣef uɛrur n uɣyul-nni, ma d nekk ṭṭafareɣ deffir-nsen. Ur ssineɣ ara taddart-a. Akken i netteddu, ttxemmimeɣ: wiss mi ara d-imɣureɣ ma ad d-yeqqim jeddi Meqqran ɣef uzagur-iw neɣ amek! Axaṭer nekk ur cukkeɣ ara ad as-zemreɣ netta i igan annect n leɛǧeb! Aɣyul-nni yettɣiḍ-iyi meskin: ur as-ttakken ara ad yečč rnu yezga yeddem-d; ama d imdanen ama d isekla! Akka i yella lḥal.

Bɣiɣ ad mmeslayeɣ d umdakel-iw bu yimeẓẓaɣ imeqqranen; akken ad ɛeddiɣ ad aẓeɣ ɣur-s, ad iyi-d-iwehha jeddi Meqqran, am akken yeqqar-iyi-d: aẓ akkina,. Abrid akk yewwi-tt-id sufell n uɛrur n uɣyul, yerna yal mi ara yeḥbes ad yečč, ad t-yewwet, ad as-yekkes učči gar wuglan-is, yeqqar-as kan “err, err..”, err-ayi, s tutlayt n yiɣyal annamek-is “ddu”.

Iɣaḍ-iyi lḥal nezzeh. Aya yegra-iyi-d ddeqs n tikta ɣer uqerruy-iw: amek akka, aɣyul yettɛebbi, yettaɣ awal, ur itett ara akken iwata, werǧin yenna-d ala – tutlayt-is ar ass-a ur tt-ssineɣ ara akk imi ur d-yettmeslay ara xilla–, maɛna ur as-ttakken ad yečč akken ilaq, ur t-ttḥadaren! Awah, ur ilaq ara ad mmageɣ am uɣyul-a, a mulac terwi ɣef uqerruy-iw! I txeddem tsusmi ɣef tmuḥeqqranit… ih, iɣyal-a ttɣiḍen…

Itri, 04/10/2024