BAC 2025 d tmuffirin-is. D acu ibeddlen gar zik d tura?

Akken i neḥsa akk, akayad n BAC yesεa azal meqqren di tudert n unelmad d twacult-is. Imi win i t-d-yewwin yessers tayajurt tamezwarut n yimal-is ara yebnu s ufus-is.

Anelmad yettuɣal d asdawan i kra n yiseggasen, syin akkin ad yekfu taɣuri-s ad yekcem deg umaḍal n uxeddim.

Lameεna gar zik d tura mačči kifkif. Ama d ayen yerzan aswir, iswi n unelmad, ttexmam-is, neɣ d asirem-is. Zik inelmaden akk kifkif-iten meḥsub, d arraw n yiẓawaliyen i d-yekkren di lḥif, ihi ggaren-d deg yiqerra-nsen yiwen n yiswi kan, ad ɣren akken ad kksen lmizirya fell-asen d yimawlan-nsen. Ad fakken taɣuri-nsen akken ad xedmen ad beddlen addad n tudert-nsen. Γas ulac ttawilat, ama d idlisen, ama d internet, ama d tuččit yelhan, εefsen iεewwiqen, sbedden iqerra-nsen d wid n yimawlan-nsen.

Ass-a kullec ibeddel, ttawilat llan, lebɣi ulac. Tasuta n wass-a tufa-d kullec yeddez yebrez. Ama d internet d temsirin i d-srusun yiselmaden deg-sent. Neɣ d timsirin i rennun s yidrimen nnig n wayen i qqaren deg tesnawit. Ama d ttawilat n tudert igerrzen, seg tuččit, taguni, axxam, d yimawlan i yezgan ssebɣasen deg-sen s tedrimt d wayen akk ḥemmlen akken ad ɣren. Ayagi akk, yerna llan wid ur necliε ara akk ma wwin-t-id neɣ ala.

Ur d-neqqar ara akk inelmaden, meḥsub tuget deg-sen ttaǧǧan iman-nsen armi d ayyur aneggaru i wakken ad ɣren ayen i walan deg useggas s lekmal. Neɣ ttḥissisen i kra n wid yettusemman d iselmaden ttaken-d i warrac 4 neɣ 5 n yisental ara fernen ad ten-ɣren. D ayen dɣa i yeḍran aseggas-a i yinelmaden i ten-yettabaεen, uɣen awal-nsen, ufan-d iman-nsen di yir liḥala. Acku isental-nni i d-bedren ur d-ddin ara .

Ma neddem-d amedya ɣef waya, agezdu n tsekla akked tfelseft, teḍra-asen am yimehbal. Deg tfelseft tanga tagejdant n ugezdu-ya ur d-ddin yisental i asen-d-semman yiselmaden-a, d ayen i yeǧǧan inelmaden kecmen deg addad n uqdaε n layas.

S ugzul n wawal, inelmaden ilaq ad d-uɣalen ɣer tilawt. Akayad n BAC ilaq-as aheyyi seg tazwara n useggas armi d taggara-s. Ilaq-as rrẓana, ssber akked leεqel.

Ma d nekkni seg tura ad asen-nini i wid i t-id-yewwin ayyuz fell-awen, ma d wiyaḍ afud igerrzen ɣer sdat.