I kečč, i kečč yesεan ul d azedgan

Ass-a riɣ ad rreɣ tajmilt, neɣ ad snemmreɣ kra win mazal ul-is zeddig di tallit taqesḥant, win akken yeǧǧan tiggura n ul-is ldint i lεali ɣas ulamma ttwabellεent fell-as akk teggura. Win ixeddmen lxir i wiyaḍ imi yettaf iman-is, yettḥulfu s tumert n wiyaḍ. Win ur nessin tuḥsifin d ccḥani.

Ẓriɣ ul-nni ddeqs i yesrewten deg-s, aṭas i yeksen deg wannar-is s yir nniya, ddeqs n wawalen i t-ijerḥen, ddeqs n tegnatin i t-iqerḥen, buhan n tiyitiwin i yečča s tsussmi. Aṭas i t-yesluɣen, beddlen-as ini, netta i mellulen am tiqqit n uyefki.

Ih ur ɣfileɣ ara, ttyeqneɣ ul-ik yeččur d ccwami n yir imdanen i yesεan ul yekkat kan, ul-nsen ur yeddir, imi ur ksiben aḥulfu lεali. Meεna ul-ik kečč yugi ad ibeddel ssifa, aḥlil.

Acḥal n tikkelt i d-as-tenniḍ ad beddleɣ, ad iqsiḥeɣ am nutni, ad uɣaleɣ dir-iyi, ad as-ḍluɣ i wul-agi acebḥan ssbiɣa taberkant, amer ahat ad ḥluɣ seg uḥulfu-ya i yi-d-yetεayaren s wiyaḍ d tebɣest i sεan akken ad d-ssufɣen teqseḥ n wulawen-nsen. Besseḥ d awezɣi, yugi-ak wul-ik yak?

Iban acimi, acku ul-ik d azedgan, yesfa am temdunt-nni n waman ideg tzemmreḍ ad twaliḍ udem-ik.

Ur sḥissif fell-as ur t-tettɣunfu, imi times werǧin teɣleb aman, d ayen dɣa i k-iḍerrun ula i kečč.

Γas tikwal yeččaray wul-ik d timerẓuga n zzman, d wayen i k-iga umdan, yettεadday-d fell-ak ujajiḥ n tmes, yettɣaḍ-ik lḥal ɣef yiman-ik, teqqareḍ times-agi n tikkelt-a ur tettnusu ara. Meεna ad iεeddi kan kra n wakud, ad tεeddi tagut n wayen ihwah i d-ikecmen ɣer wul-ik i teswiεt kan, ad tuɣaleḍ ɣer lasel-ik, ad d-yeḥnin wul-ik amzun n tabbuct n tyemmat ur nessuṭeḍ mmi-s i kra n wakud, teqqim kan tebra-d i yizir n uyefki tiḥnin-d ɣef mmi-s.

Akken i d-ak-tḍerru myal tikkelt, acku ablaḍ ur yettcabi ibressi, aneggaru-ya ayen i t-yessaɣen ad yefsi imi d aleqqaq am kečč.

Mebla ma tenniḍ-iyi-d ẓriɣ ddeqs i tsumḥeḍ, xilla i teǧǧiḍ di lheq-ik, buhan i k-yessettrun kečč ur tuklaleḍ. Segmi i d-tecfiḍ i ddunit, nutni qqaren-as kan wihin d uḥnin, ul-is d lεali-t. Seg tama-tayeḍ sseččen-ak timerẓuga anda ma llant ur cliεen deg-k neɣ deg ul-ik amellal. Lemeεna kečč teqqimeḍ d kečč kan, imi ma tbeddleḍ ur tettafeḍ iman-ik.