Acimi i tuli ssuma n zzit uzemmur nezzeh aseggas-a?

Γas ulamma aseggas-a i yella uzemmur ugar n yilindi, imi aseggas yezrin meḥsub ur yurew ara mliḥ, meεna ssuma-s tuli nezzeh ɣef tin n yiseggasen iεeddan. Dɣa, akken kan i ldint tεessarin n uzemmur tiggura-nsent i tuẓẓda, bdan yemḍebbren-nsent ttaɣen zzit uzemmur s ssuma ɣlayen, gar 1000 akked 1200 n yidinaren dinna deg umkan. Syin akkin, nutni ttεawad znuzuyen-t gar 1300 d 1500 n yidinaren. Yuɣ lḥal llan wid i yettagin maḍi ad zzenzen, imi bɣan ad t-ssufɣen i berra n tmurt, ad rebḥen deg-s ugar.

Ahat d tikkelt tamezwarut ara taweḍ ssuma n zzit uzemmur i teknef am ta. Ula d iεeqqayen ass-a ttnuzun s Ukilu. Niqal, nufa-d azemmur yettnuzu d zzit, ass-a yuɣal yettnuzu d aεeqqa. Yerna ayen yessewhamen, amek armi yewweḍ Ukili n uzemmur i 170 neɣ 180 n yidinaren.

Ma nemmeslay-d cwiṭ ɣef tmentilin n tmerniwt di ssuma n uzemmur neɣ n zzit, ahat tamentilt tamezwarut d wid i t-yettaɣen s ssuma ɣlayen i wakken ad ssufɣen i berra n tmurt. Tis snat, ula d liḥala n tdamsa tamaḍalant tekka deg waya, acku ulac asafar  yeqqimen s ssuma-s taqburt. Kra yellan, tuli ssuma-s. Tis kraḍ d afares n wid yesεan deg wid ur nesεi. Yak tadamsa tebna ɣef umenzay-a.

D wid yesεan i yesselḥayen agadaz neɣ ssuq. D ssuma i d-ferḍen nutni ara yilin. Rnu i waya, imsudar ( consommateurs) ur ssinen i tsertit n ugadaz, akken kan ufan lḥaǧa ad tt-id-aɣen.

Ddeqs n yiḥerqan i yettwakren, buhan n tzemren i yettwagezmen ddant akken s iferr s uεeqqa. Ula d tileqqamin timecṭuḥin ur slikent ara. Γef leḥsab n tnaga n yiwet n tmeṭṭut, ttawin-d yimukar tikamyunin deg yiḍ, ttakren iḥerqan ibeεden ɣef tnezduɣin n medden. Daymi i d-yewwi ɣef myal yiwen ad iεass ireẓẓi-s.

Llan kra n yifellaḥen neɣ n yexxamen s zzit uzemmur i d-ttεawanen iman-nsen. Meεna, ass-a, ufan-d tizemrin-nsen ttwacerwent akk.

Anda-tt tejmeεt i yellan d tamasit ɣef uselḥu d tuddsa deg tudrin-nneɣ? .