Tuɣalin ɣer tejmilt n Zedek Mouloud i Yidir: asaru s wudem n tezlit!

Akken i d-nberreḥ yakan deg uɣmis Isahliyen, aṭas aya segmi yella yettheyyi unaẓur Zeddak Mulud tizlit n tejmilt i ucennay ameɣradan (universel) Idir.

Dɣa, ilmend n usmekti n useggas ɣef tmettant-is, isuffeɣ-d mmi-s n At Xelfun tizlit-a deg terga-s tunsibt n Youtube ass n 1 mayu 2021. Tizlit-a tamaynut yebna-tt Zeddak Mulud am usaru ɣef bab n tezlit « Baba-inu ba » segmi i d-ilul di Tmurt n Yiqbayliyen armi yemmut di 2 mayu 2020. Imi yebda Zeddak Mulud asefru-s s usmekti n temnaḍt n At Yenni anda ilul Yidir, d ulaεi n yimezdaɣ-is ɣef wazal amiran n urgaz-a i mazal yettidir ɣas yemmut.

Yuwi-d dɣa taseddart-a tazwara s tmenna:

Uzneɣ-k ay itbir
Zzi-d yakk i tmurt
Ur ttaǧǧa ara awzir
S ubeḥri n tefsut
Yal taddart εjel s lḥir
Awi-asen ttbut
Seg Wat Yenni ɣur-k zwir
Bedd tawwurt tawwurt
Meslay-asen ɣef Yidir
Amer ahat ḥesben yemmut
Yedder, yettidir, ad yidir
D argaz iwumi ur tezmir lmut

Syin akkin yekcem Zeddak Mulud di ccna d ukemmel n uwessef n usaru n Yidir mi aɣ-d-yettawi seg tikkelt ɣer tayeḍ taḥawact n tezlatin i yecna Yidir deg umecwar-is. Ula d aẓawan i as-iga Zeddak i tezlit, temyercal akken iwulem d yimeslayen d yiḥulfan i d-yuwi. Yecna ihi di tseddart-a:

I uzger i d-yeǧǧan lemtel
Limer ur tt-imeggel
Akken ara teqqim d asuki
D argaz i yeqqazen ɣef lasel
Ad t-id-yessekfel
Asmi nwan medden ur yelli
D ameddaḥ irefden ṭṭbel
Akken ad aɣ-imel
Cfiɣ amzun d iḍelli
Yidir d ayen yakk i nḥemmel
Nekni s Leqbayel
D aḥiḥa d izlan d cnawi

Mi d-yesmekti kra n ccnawi-s d wazal n Yidir di tudert-is ɣur Yizwawen abeεda, ikemmel Zeddak Mulud asenεet n tugniwin ɣef wayen d wamek yecna Yidir ɣef tgemmi-nneɣ, idles d wansayen s umata. Isefra i tikkelt nniḍen ula ɣef umḍiq i yesεa ɣur-neɣ. Di yal taseddart ad nwali Idir deg walbaεd n yiseggasen deg umecwar-is, rnu ad d-nmekti kra si tezlatin-is icebḥen.

Yidir d afzim n lfeṭṭa
Sser d ccbaḥa
Ay aḥeddad n At Yenni
D taddart-nni di ccetwa
Asemmiḍ lehwa
D lkanun m’ara as-d-nezzi
Yidir d jeddi d jidda
D timucuha
I aɣ-izzuzunen di temẓi
Yidir d baba-inu ba
A yelli Ɣriba
D acerdiw ɣef tgemmi

Ikemmel Zeddak Mulud agmar n umawal i d-yettuɣalen aṭas di ccna i nessen ɣur Yidir. Am « abernus », « tislit », « taqbaylit », « tamaziɣt », « amendil awraɣ » d waṭas n yirman nniḍen. Akken i d-nenna, di yal taseddart ad nwali kra seg usaru n umecwar n Yidir, ad d-nmekti daɣen taḥawact n tezlatin-is yettwassnen nezzeh.

D abernus s i d-tcebbeḥ teslit
S zzux tesbur-it
D talaba n sser d yiseɣ
Yidir d iniɣem d zzit
D abelluḍ bu tcacit
D Ǧerǧer s udfel yesleɣ
D idles-nni i turǧa twaɣit
I tatut yekkes-it
Yuɣal ɣer leǧnas yeffeɣ
Yidir d tiɣri n teqbaylit
Iwumi i d-terra tmaziɣt
D Azwaw s umendil awraɣ

Di taggara n usaru-a ideg i d-imeslay Zeddak Mulud ɣef lmut n Yidir, yefren ad t-yesnemmer ɣef wayen akk i aɣ-d-yefka s wudem n tẓuri. Yesbeyyen-as-d asṭeεref-nneɣ d ceffu ɣef lxir-is anaẓuran. Isbeyyen-d temɣer n wayen i d-yeǧǧa, yessarem-as talwit anda yella.

Tanemmirt tessendeḍ taxcact
Tefka-d tawaract
Lxir-ik deg-neɣ yettqir
Ay itri iwumi tzad tafat
Yes-s i nwala ɣer sdat
Yes-s i nwala ɣer deffir
Amek limer ur telliḍ ahat
Anwa ara iferrzen taswiεt
N wayen yelhan d wayen n dir
Ayen yakk nebɣa deg-k nufa-t
Ruḥ ihi ar tufat
Sgunfu di talwit a Yidir

Mi yekfa ccna n tezlit-a n tejmilt, yuɣal-d bab n « Tidderwect-iw » i tmenna di tseddart taneggarut. Deg-s isres di tqacuct azal n unaẓur di tmetti anda yettidir. Akka! anaẓur d tisit n ugdud. Akken yella unaẓur i yeṭṭafar, akken ara yili!

Anaẓur d lemri n ugdud
Deg-s mi iwala
D iman-is i yettmuqul
S tayri ɣer ɣur-s icudd
S yes-s iḥulfa
Yufa-t yid-s iddukkul
Γef tgemmi yeṭṭef addud
Yeskan tanila
Xas ma yella abrid iḍul
Ala netta i yernan akud
Iḍelli, ass-a
Neɣ ahat azekka i d-ilul
Ta ad tt-iḥudd, ta ad tt-ihudd
I limer ur yella?
Anwa ara ak-imlen tidet ay ul?

Slet-as i tezlit-a, s uẓawan-is yelhan d yimeslayen-is yesḥulfuyen deg wassaɣ-a n terga Youtube tunsibt n Zeddak Mulud.