Taɣuri n tezlit « Ameɣras – Tafsut » n Zedek Mouloud
Deg wayyur n wamber 2020, i d-yessufeɣ umaru Mhenni Xalifi adlis n tɣuriwin d yisefra n unaẓur Zedek Mouloud, s uzwel “Zeddak Mulud – Tamḥaddit d tmedyezt”.
S ttesriḥ n umeskar, newwi-awen-d deg umagrad-a taɣuri i iga i tezlit n Ameɣras n Tefsut, i d-yeffɣen di 2003. D tajmilt i yimeɣrasen n Tefsut Taberkant.
Tzemrem ad tafem adlis-a di Tmurt neɣ deg internet deg tansa-a n lulu.com.
Taɣuri n tezlit « Ameɣras – Tafsut » n Zedek Mouloud
Ulamek ad tɛeddi tedyant n Tefsut Taberkant war ma tḥuza tasa, ul d wallaɣ n Zeddak Mulud. Yuɣ lḥal, ikki cwiṭ ula deg ugraw n Leɛruc seg 2001 d asawen mi d-innulfa.
Deg useggas n 2003, yuɣal-d ihi s yiseɣrez amaynu « Aderwic » ideg i d-yuwi tasedmirt tanaẓurant tameɣnasant ɣef uxessar-nni i iga udabu n Lezzayer di tarwa-nneɣ.
Deg uḥric amezwaru n tezlit “Ameɣras – Tafsut”, iga iman-is di tsetna deg wadeg n yilemẓi-nni Azwaw i ittluɛan tamurt iɣef iɣli, ideg yenna: « Fell-am ay imma i ɣliɣ, i fkiɣ idmaren i rrsas ». Ɣas ulama, di tidet, ittluɛa tamurt i iṭṭfen amḍiq n Tmurt-is, i ur nelli ar ass-a d tilellit.
Nekk ɣer ɣur-m ur n-ttezziɣ
Kemm ɣur-i ad d-tezziḍ yiwwas
Fell-am a yemma i ɣliɣ
I fkiɣ idmaren i rrsas
D lehna i am-bɣiɣ
Qublen-iyi-d s uḥlalas/ s uqerḍas
Yemma yemma
Deg wawal-nni dima, iseḍlem yilemẓi azwaw tamurt n Lezzayer i tent-iɣerrmen deg uqerruy-is tal tikkel: « D asfel kan i yi-tḥemmleḍ ». Ihi izmer ad igzu yiwen belli tamurt i ittakken arraw-is d iseflan, i ten-issamasen s yidammen, ur ten-tḥemmel ara maḍi.
Kra n tikkelt ideg ad am-texweḍ
D nekk kan ideg tetteffeɣ
Kra n tinna ideg texnunseḍ
Tcerḍeḍ-iyi ad am-sefḍeɣ
D asfel kan i yi-tḥemmleḍ
D asfel kan i am-laqeɣ
Mi yi-teḥwaǧeḍ ad iyi-d-teddmeḍ
Mi tekniḍ, nekk ad rrẓeɣ
Mi tekniḍ, nekkini rrẓeɣ
Yemma yemma
Di tseddart nniḍen, inced umedyaz allaɣen ma yella kra n umdan i d-ilulen yella? Ladɣa wid umi tettwakkes tmagit am nekni. Mi d-isenṭeq ihi ilemẓi-nni Azwaw i ikkren, yenna-aɣ-d gar tsebbiwin iɣef i d-ikker d lebɣi-s i tillin.
Win yeǧǧa usirem netta mazal-t ur yelli, amek ad yugad ihi ad imlil tamettant?
Lemmer ur d-luleɣ ara
Akkenni axir-iyi
Lliɣ ur lliɣ ara
Turweḍ-iyi-d dayagi
Sarmeɣ ur d-iban wara
Armi kem-uyseɣ dayenni
Deg-m ur ddireɣ ara
Mmuteɣ uqbel ass-agi
Yemma yemma
Win umi reglen yiberdan, ilaq-as ad ifres, ad iqazem tiqraḥ d tuqqsiwin, ad d-yeg abrid i yiman-is. Di tigawt-nni, iban ad ittwaslex, ad ittwaqqes, ad ittwajreḥ. Dɣa, ibder-d unaẓur ula d tamentilt tagejdant iɣef ɣlin yimeɣrasen Izwawen, mi d-irra awellih i tigawt n Kamal Ircen i yuran s yidammen-is awal “Tilelli” s tefransist. Ihi, fiḥel awennit! Ala s tlelli i tzemreḍ ad terreḍ yella wayen i ak-ittwakksen, am usnerni n yidles d tadamsa, aqeyyem n umezruy aqbur, aseggem n unagraw asegman, atg.
Ḥsu d amcum ur lliɣ
D kemmini i yi-irran
Reglen yiberdan i uwiɣ
D taruẓi kan i d-iggran
Ayen akken iɣef wayeg i ɣliɣ
Tinna akken iɣef wayeg i yi-inɣan
S yidammen-iw i am-tt-in-uriɣ
Ǧǧiɣ-n ifassen-iw ḍebεen
Yemma yemma
Syin akkin, izzi-d umedyaz ɣer uzɣan ilaw n Yizwawen d wayen iɣef stehzan ur as-fkin azal-is. Abeɛda timlilit i yugin ad mlilen ɣef yiwen n yiswi akken ad yekfu uzaglu fell-asen. Ɣer taggara n uḥric-a amenzu n tezlit, iseqqef Zeddak Mulud s usirem, s yisem n yilemẓi-nni ameɣras, ahat ad d-akin Yizwawen seld anɣa-nni n udabu n Lezzayer. D asḥissef imi ar ass-a ur dukklen Yizwawen.
Wid ideg tura ddeεwessu
I tura ma ad as-kkren
Wid-n ideg ur iǧǧi beṭṭu
I tura ma ad mlilen
Wissen ma d tuqqda n usafu
Wissen ma ad ldint wallen
Wiss meqqar s yidammen-inu
Ma ad dawin tagmat yuḍnen?
Yemma yemma
Syin ɣer da, deg uḥric wis sin n tezlit, iluɛa Zeddak Mulud srid ilemẓiyen akk i ikkin deg Tefsut Taberkant d wid i iqeblen ad nnaɣen d uɛdaw ɣef yiseɣ, tilelli, idles d tutlayt. Irra-asen tajmilt s taɣect-nni tazurant n usḥissif d wurrif, ama s wid immuten, neɣ s wid iddren, imi d tilelli iɣef nudan.
Yenna-d umedyaz ulamek akk amek ara yili usuref i win i tt-isawḍen ɣer usenɣel n yidammen n warrac-nneɣ. D ayen i t-yeǧǧan indeh s yakk iḥulfan-is, imi tawaɣit n tikkelt-nni, akken i t-id-inna, mačči d kra n cwiṭ. Yuɣ lḥal, aberriḥ n “Ulac ssmaḥ ulac” mazal-it ar tura deg unnar.
Ay ul-iw i tent-ittafen
A tikkelt-agi i d-tessewḥac
A mačči am tigad nniḍen
Siwa ma ḥudren leεrac
Anda akken mmaren yidammen
Idammen
Ad nadin ɣef ssmaḥ ulac
Mačči cwiṭ i d-isaren
I aɣ-yuɣen
Ɣlin deg yiberdan warrac
Akken nnan yimezwura: annect tebɣuḍ teɣẓifeḍ ay iḍ, d uleqrar ad yali wass. D inzi-a i d-isekfel umedyaz di tsetna n tezlit imi, yuɣ lḥal, aṭas n yinzan i iseqdec di tezlatin-is. Dɣa, d tuzzya n ddunit s wussan d wuḍan-is i inced unaẓur akken ad d-ibder taluft n tiririt n ṭṭar sɣur umeḥqur.
Anwa akka i ak-izemren ay iḍ
Ala win ma ad d-isseḥseḥ
Annect i tebɣuḍ tekkiḍ
Ɣas teɣbiḍ
D uleqrar ad d-tbaneḍ a sseḥ
S kra n win i aɣ-d-yuznen ucwiḍ
Ad as-tiliḍ
Akken neqlaleḥ ad iqlileḥ
Isemmed umedyaz asenfali n yiḥulfan-is i wat tissas i innuɣen s yifassen d ilmawen akked yiwaɣezniwen. Ifren ihi ad d-yefk tugna tacebḥant i wayen qublen, mi asen-yenna d asirem i d-rran mi teswa Tmazɣa idammen n tlelli, akken yella lḥal seg zzman aqbur.
Ma iɛemmed ad iqubel umdan tamettant, mačči kan d tabɣest i t-ideggren, wanag ula d tagnit ideg ittidir war idles, ittwali-tt d tamettant. Awal-a nnan-t-id dɣa ddeqs n yilemẓiyen deg 2001. Ula d Zeddak Mulud, am win i asen-yefkan azref, yenna d tamettant, i qublen ɣef tlelli, wala tudert i aɣ-d-iggran ddaw uzaglu.
Ɣas tjerḥem di tefsut
S yidim tesswem timmuzɣa
D asirem i d-terram i tmurt
Ay izmawen n Ǧreǧra
Tqeblem ad tqablem lmut
Tif lmut
Wala tinna ideg i d-neggra
Ay imeɣrasen n tugdut
Steεfut
Ay at nnif d lḥerma
Deg tseddart tayeḍ, iggul Zeddak Mulud dakken ur ikeffu umennuɣ n yimeɣrasen-nneɣ i issaramen tudert n tefsut d tin n yiseɣ. Ihi, iban ad ikemmel uzbu, imi win umi tella tlelli deg yidammen, ur iḥebbes armi tt-imlal. D asmekti kan, tadyant-a n Tefsut Taberkant aṭas n yiberdan i d-tettwasmekta di tuɣac n Zeddak Mulud seg 2003 d asawen.
Aḥeqq tikli taberkant
Aḥeqq tagrawla n ublaḍ
Aḥeqq tafsut taqurant
Aḥeqq anebdu asemmaḍ
Win i tḥuza tbuciḍant
Wiss ma nnan-t
M’ara as-tebru ad irnu anfaḍ
Ɣur-wat ad as-tinim frant
Neɣ kfant
Ma kfant ad d-jaben tiyeḍ
Dima s uɣanib n unaẓur-nni issaramen, am yal amdan i ittmuqulen kan ansi ara d-teflali tafat deg ufalu-nni aɣezfan, ikfa umedyaz asefru s usirem nniḍen ara d-ismektin dakken ɣas ad teqseḥ tegrest s yideflawen-is, maca ad d-awḍen tefsut d unebdu, ad ten-sefsin. D acu kan, yefka-d tawtilt ɣer taggara ɣef wayen irzan taluft-nneɣ d usmurres deg-s, mi d-yenna: « Ɣur-neɣ ara d-teggri ». Neɣ akken i d-iqqar tal tikkelt : « Skud tellam taqbaylit ad tili, ma teddam tamaziɣt ad tennerni, ma tebɣam yiwwas ad d-tezzi tlelli ». Teqqim-d ihi i tsuta n tura, ad siwḍen amennuɣ ɣer yiswi.
Ma ijur usigna d adfel
Anwa akka adfel ur nefsi?
Ma tjur tuqqna d ssnasel
Kullci ad t-id-teqsed truẓi
Annect i tebɣu tεeṭṭel
Ma ad tebṭel
Ɣur-neɣ kan ara d-teggri
Ad tebdel neɣ ad tt-nbeddel
Ad tt-nesdukkel
Sanda akken nebɣa ad tt-nawi
