Tamettant n Ǧamel Ben Smaεil: D aniwa i yellan deffir-s?

Ǧamel Beb Smaεil, d yiwen n yilemẓi seg Xmis Melyana, i iruḥen d asfel iḍelli di Larebεa n At Iraten.

Aneggaru-a sserɣen tafekka-s, imi cukken-t d netta i yessekren times di temnaḍt-a.

Γas ulamma ɣef leḥsab n wawal n tuget n yiɣmisen, ilemẓi-a d arraw n Larebεa n At Iraten i yellan d tamentilt n tmenɣiwt-is. Lameεna ar tura, mazal ur d-iban d aniwa i t-yenɣan, acimi, d acu yellan deffir n tmenɣiwt-a, d acu yeffren daɣen.

Tella kan yiwet n tɣawsa tban am tafukt, ayen yeffren deffir n temsalt-a ugar n wayen i d-ibanen, imi mcubbaken nezzeh lexyuḍ-is.

Taqṣidt tebda-d imi i d-yeffeɣ wawal belli yella win yeseddayen takerrust war taplakt n ujerred, di Larebεa n At Iraten. Syin akkin uzzlen yimezdaɣ ṭṭfen-t-id, ufan di tkerrust-is tickarin ifuḥen d lmazut.

Imezdaɣ yeffeɣ-iten leεqel, cukken deg-s d netta i yessekren times. Imir-n dɣa sḥebsen takerrust, ssufɣen-t-id, mudden-t i yiɣallen n laman.

Ineggura-a ur ṣṣawḍen ad ḥudden fell-as, acku llan wid izedmen ɣer ɣur-sen suffɣen-t-id.

Ddeqs n medden i yesteqdayen amek armi ṣṣawḍen kra n yiɣermanen ( citoyens ) sɣelben ɣef yiɣallen n laman, kksen-asen-d ilemẓi-a, acimi ur t-nɣin ara tikkelt tamezwarut imi yella gar yifassen-nsen.

D anwa-ten wigad i yellan dinna s yimayuten d iẓeggaɣen, i wid i t-yenɣan yaḍra d arraw n Larebεa, neɣ d iberraniyen.

Akken i d-nnan kra n wid yettabaεen tadyant-a, iwacu ulac win yegren iman-is i wakken ad yeḥbes timenɣiwt-a.

Seg tama-nniḍen, acimi i ileḥḥu ilemẓi-a s tkerrust war ajerred, neɣ s unamek-nniḍen, d aniwa i as-yekksen taplakt i tkerrust-is.

S ugzul n wawal, ilaq ad d-yili unadi ɣef yiẓuran n tedyant-a, ad fsin lexyuḍ yemcubbken. Ad yesteεfu netta deg uẓekka-s di talwit.