Amaynut di ccna: Aḍebsi ajdid n Rabeḥ Tamiti akka tura di ssuq

Seld kra n lɣiba, yuɣal-d ucennay Rabeḥ Tamiti s umaynut n ccna umi yefka azwel “Bougie ma citadelle”. Amaynut-a i yettawin ṭam (08) n tezlatin, yeffeɣ-d ɣer Teẓrigin Sumam n Bgayet, ddurt yezrin.

Deg-s, yesqerdec unaẓur aṭas n tlufa, am wayen icudden ɣer tudert, tamdint-is n tlalit Bgayet, imdanen di ddunit, timeɣriwin d waṭas n yisental nniḍen iɣef yecna ilmend n umaynut-a i ttraǧun nezzeh wid i t-iḥemmlen.

Ilul unaẓur Rabeḥ Tamiti deg Bgayet, aseggas n 1957. Yebda amecwar-is mettwal aseggas n 1977, di trelluct n temẓi-s. Seld aεeddi-s deg tedwilt n radyu Iɣennayen n uzekka n Crif Xeddam, yegzem-itt ad yebdu asekles n tezlatin-is. Dɣa, deg useggas n 1982 i d-isuffeɣ tasfift-is tamenzut ɣer Teẓrigin Iṭṭij. Seg yimir-nni ar ass-a, isekles ddeqs n yiseɣraz (albums).

Ugar n uẓawan aḥlawan, yettwassen unaẓur Rabeḥ Tamiti s yimeslayen yelhan i yeslusuy akken iwulem i tezlatin-is. Meḥsub, tal tikkelt ara asen-isell yiwen, yezmer ad yeεqel amek d wacḥal tezdig tmedyezt-is.