Bgayet: ddeqs n yilemẓiyen i yemmuten di lebḥer

D yir isalli i d-ileḥqen tanezzayt n wass-a, 25 di ctember, i twaculin n kra n yilemẓiyen n twilayt n Bgayet. Ineggura-a mmuten deg yilel ( lebḥer ), imi εerḍen ad ffɣen tamurt, ad ḥerqen i Tmurt Taspelyunt ( Espagne ).

Γef leḥsab n yisallen i aɣ-d-yeggḍen, d Tamɣunt( ligue ) Tazzayrit n Uḥuddu ɣef Yizerfan n Wemdan ( LADDH ), i d-yessawlen tanezzayt n wass-a i twaculin n wid iɣerqen. Ayagi, i wakken ad εeqlen udmawen n warraw-nsent.

Ad d-nesmekti belli, ilemẓiyen-a qelεen seg yilel n twilayt n Wehren, ddurt yezrin, ar tura ur iban deg wacḥal yid-sen.

War ccek, mačči d tikkelt tamezwarut i yeggi lebḥer tirwiḥin n wid yeffuden tudert lεali, n xid yessarmen imal yelhan.

Yuɣ lḥal, ɣas ahat ilemẓiyen-nneɣ ẓran d acu d amahi i ten-id-yettεessan, fernen lmut wala tudert n tmara.

Maḥsub, ulac win ur neẓri d acu yettidir uɣerman (citoyen) Azzayri d uguren di tudert-is n yal ass.

D ayen i t-yeǧǧan dɣa, yeṣruḥ asirem, yettxemmim kan ɣef tuffɣa, d wamek ara yezger ilel i tmurt n tirga.

Ad d-yazen Rebbi tabɣest i twaculin n wid yemmuten.