Aseqdec n lgaz n temdint (CO) : kra n yiwellihen i tɣellist-nwen

D lawan n tegrest d uṣemmiḍ, ihi, tuget n medden ussan-a, bdan sseqdacen afurnu-nsen i ileḥḥun s lgaz temdint ( monoxyde de carbone CO ) deg yixammen-nsen.

Γas ulamma llan yakan sseqdacen-t deg tkuzint, meεna amur ameqqran n twaɣiyin n uxnaq s lgaz-a ttilint-d deg tegredt. Ayagi imi, imir-n ttbelliεen medden kullec, yettxuṣṣu nezzeh ubeḥri deg uxxam.

•Timentilin (causes ) n uxnaq n kra medden s lgaz-a, d tmettant-nsen

Tamentilt tamezwarut, d tiɣin n ifernuten d yiteyyuten i ur nelhi, neɣ wid irexṣen di ssuma. Ineggura-a, ad iεeddi kan cwit n wakud fell-asen, ad uɣalen ssuffuɣen, ayagi seg yiwet n tama.

Seg tama-nniḍen, yiwen ilaq ad d-yawi axeddam iẓewwren nezzeh deg lecɣal-agi, win yesεan tarmit, win yettwassnen s uxeddim-is igerrzen. Dɣa netta s ttimad-is, ad awen-d-imel d acu akk ilaqen.

Tamentilt tis snat, medden ttsekkiren kullec deg uxxam, bɣan ad ḥmun. Lameεna ayagi d amahi fell-asen, imi lgaz-nni yerɣan i d-yewwi lḥal ad yeffeɣ, yettɣimi dinna. D ayen i ten-yettaǧǧan ttmettaten s uxnaq.

Ihi, ilaq ad yeldi yiwen tittwiqin timecṭuḥin deg teggura akked leḥyuḍ n wexxam-is. Rnu i waya,myal tanezzayt n wass ilaq ad yeldi ttwiqan i wakken ad yeffeɣ lgaz-nni yerɣan, ad d-yekcem ubeḥri yesfan. War ma nettu, yewwi-d fell-as ur yettbelliε kullec.

Timentilt tis kraḍ, d aseqdec n yifurnuten d iteyyuten iqburen war asizdeg. Ineggura-a dɣa, ttbelliεen, ttuɣalen ur sεeddayen ara lgaz.

• D acu ilaqen i tɣellist-iw ( ma sécurité) d tin n twacult-iw ?

I tɣellist-ik d tin n twacult-ik:

Sbuḥruy axxam-ik akken ilaq myal ass
Sbedd tamacint tuzzigt i d-yeqqaren ma yeffeɣ-d lgaz (détecteur de monoxyde de carbone)

I yisalli, tawaɣit taneggarut i yeḍran ɣef sseba n CO, tella-d di Ɛin Azal, tawilayt n Ṣtif send iḍelli.

Anda i ruḥen kuẓ (4) n yiεeggalen n yiwet n twacult d asfel-is. Tayemmat i yesεan 32 n yiseggasen di leεmer-is, akked 3 n warraw-is.

Taɣellist-nwen deg ufus-nwen, ttḥadaret iman-nwen