Tadamsa: tuli ssuma n lxebz deg ddeqs n twilayin n tmurt

Aɣerman (citoyen) Azzayri s umata, d lmuḥal ad yidir war ayefki d llxebz. Yuɣ lḥal, d ayen i as-tefka taswiεt ad t-id-yettaɣ myal ass.

Neɣ s unamek-nniḍen, ɣef leḥsab n waddad n tdamsa-s ( économie ), d ayen umu yeṣṣaweḍ, ladɣa deg wayyuren-agi yezrin, imi teṣṣelbeε ssuma n kullec ama d igumma neɣ d tidal.

Lameεna, am yal tikkelt yettemlili-d uguren-nniḍen di tmeddurt-is. Dɣa, rnu i uyefki i ixuṣṣen nezzeh ussan-a, tuli daɣen ssuma n llxebz agaman di tuget n twilayin n tmurt-nneɣ, anda i telḥeq ass-a di kra n temnaḍin i 15 n yidinaren.

Ad d-nesmekti belli, ssuma n llxebz-a tella 10 n yidinaren seg wacḥal-aya.

I yisalli, tidukkla Tazzayrit n Uḥuddu ɣef umsider (consommateur), teffeɣ-d mgal n rray-agi. Rnu i waya, tessawel-d i wid teεna temsalt i wakken ad d-gren iman-nsen deg temsalt-a.

Γef leḥsab n yemḍebber n tdukkla-a, ẓran belli ula d wid yezznuzun llxebz mačči d lebɣi-nsen, acku tuli ssuma n yisufar-is. Meεna, ula d amsider Azzayri ibubb ɣef uεrur-is ayen ur yezmir ara. Daymi i ilaq ad d-tuɣal ssuma n llxebz i 7,5 neɣ 8,5 n yidinaren.

Di taggara, ad nebder belli tamentilt n tilin-a, d uṣaḍuf n tedrimt n 2022 i d-yeffɣen yakan, i yekksen aεiwen n ddula i yemsennza. Yuɣ lḥal, deg uṣaḍuf-a n tedrimt n 2022, timεiwna-a ad tefken i wid i as-yessran srid.