Tadamsa: tuli ssuma n weksum azeggaɣ

Seld imi tuli ssuma n yigumma d tidal, ayefki d zzit, d uksum n uyaẓiḍ, tura teggeḍ-d nnuba n weksum azeggaɣ. Yuɣ lḥal, ddurt-agi kan i tuli ssuma-s, wamma di tezwara n useggasa n 2022 yella mazal ur yuli ara.

I yisalli, ssuma n uksum n ukrar, tuli s wazal n 300 n Yidinaren. Neɣ s unamek-nniḍen, lkilu n uksum-is i yellan ixeddem seg 1180 armi d 1200 n Yidinaren, di ssuq amatu ansi i d-ttaɣen yimsenza, tura yeggeḍ armi d 1400 n Yidinaren. D ayen i yeǧǧan igezzaren ( bouchers ), ssulin-t tura armi d 1700 n Yidinaren.

Seg tama-nniḍen, yuli weksum n uzger s wazal n 400 n Yidinaren. Γef leḥsab n yisallen i aɣ-d-yewwḍen, lkilu n weksum n uzger di tezwara n useggas-a yella ixeddem 1300 n Yidinaren, ma d tura yelḥeq armi d 1500 n Yidinaren di ssuq ameqqran. Daymi i t-znuzun yigezzaren s 2000 n Yidinaren.

Γef tmentilt n tilin n ssuma n uksum azeggaɣ, wekkden-aɣ-d yimsenza belli ugur ur yelli deg-sen. Lameεna, d wid i asen-d-yesnuzun i t-yessulin, acku tuli ssuma n tεelf akked tuččit n lmal d yezgaren. Γef usentel-a, yewwi-d ad d-nebder belli llan ula d wid yettrebbin izgaren, meεna ttaǧǧan-ten ḥalama yeggeḍ-d wayyur n remṭan i wakken ad ten-zzenzen. Imi, imir-n i ttafen deg-sen abaɣur, dɣa snuzun-ten s ssuma ɣlayen.

S ugzul n wawal, d aɣerman Azzayri i yettxelliṣṣen tilin n tɣawsiwin umu yesra myal ass. imi, simmal tettiqsiḥ fell-as teswiεt, tettuɣal-as tudert d awezɣi.