Tlemsan: tettwanɣa yiwet n tselmadt sɣur wergaz-is

Fatima Reḥmani, d tilemẓit i yesεan anagar 34 n yiseggasen di leεmer-is. Taneggarut-a, tella d taselmadt n tutlayt taεrabt di tesnawit, di tdayra n Rremc, tawilayt n tlemsan.

Am nettat am tlawin-nniḍen, tessarem tudert ifazzen seld tissulya-s. Dɣa ɣur-s semmus ( 5 ) n wayyuren kan segmi i tedda i tislit.

Γef leḥsab n yisallen i aɣ-d-yewwḍen, Fatima segmi i tekcem s axxam n wergaz-is ur twala ass amellal. Ayagi imi, yezga yekkat-itt, icennef-as ussan-is. Ur yesteqnaε s waya, lameεna yewwet-itt ussan yezrin armi i tessuffeɣ tirwiḥt.

Rnu i waya, Fatima tella s tadist s uqcic-is amenzu. Ihi argaz-a, yewwi snat n terwiḥin.

Seld imi yexdem ccɣel-is, yessuffeɣ-itt-id iḍegger-itt-id sdat n teggurt n wexxam. Imir-n dɣa, ssawlen yemεacren-is i yiqeddacen n Uḥuddu aɣarim. Lameεna, ur ṣṣawḍen ad d-xedmen kra imi ifut lḥal.

Ayen yessewhamen di taluft, argaz-a ssnen-t medden d amdan n lεali di berra. Yuɣ lḥal ula d netta ixeddem deg uḥric n usegmi.

I yisalli, seg tazwara n useggas n 2022 ar ass-a 5 n tlawin i yettwanɣan di Tmurt n Lezzayer. Ayen yessexliεen ugar, dakken amḍan n tmenɣiwt n tlawin simmal irennu.