Acuɣer i d-yesnulfa Donald Trump aẓeṭṭa inmetti ara iεanden Facebook d Twitter?

Ur yettεeṭṭil ad yamed 100% uẓeṭṭa inmetti amaynut Truth Social, i d-yesnulfa uselway aqbur n Marikan, Donald Trump, ayyuren iεeddan.

Ɣef wakken i d-suffɣen isallen wid i iqerben i usenfar, yezmer ad yelḥu uẓeṭṭa-a 100% sey-a ɣer tazwara n yebrir 2022. Alqem (version) n béta yebda yakan di wamber 2021.

Rray-a i yeddem uselway-a aqbur icudd ɣer wayen i as-yeḍran ugar n useggas aya mi t-qeccεent sɣur-sent tɣerɣar n Facebook d Twitter lawan-nni mi d-ffɣen yigmaḍ n tefranin n Marikan i d-iberrḥen s Joe Biden d aselway amaynu deg wadeg-is netta. Dɣa, am win iḥulfan yettwaḥqer mi as-gedlen asenfali, yegzem-itt di rray ad d-yesnulfu aẓeṭṭa ideg i d-yenna ad tili tlelli n umeslay d tidet. Imi anamek n “truth” d “tidet”.

Aṭas umi yehwa uneɣmis-a di Marikan d umaḍal merra. Yuɣ lḥal, yesεa uẓeṭṭa ula d tasnast (application) akken ad izmiren medden ad keccmen ɣur-s ula s tilifun. Akka tura inuḥ di kra n tmura kan. Aṭas n yiseqdacen i ijerrden iman-nsen deg wadeg-a.