I kečč ara yesɛeddin akayad n BAC

Seg wass-a mazal-ak-d kra n wussan kan ay anelmad akken ad tesɛeddiḍ akayad n Bakalurya, i ara ak-yeldin tiwwura n tesdawit i useggas amaynut. Imi neẓra-k ad tiliḍ tura theggiḍ seg tama n ulmad (aḥfaḍ) ed uɛiwed (arajaɛ), nefren ad ak-d-nemmeslay deg umagrad-a ɣef tnefsit ladɣa. Ad ak-d-nawi kra n waqqayen (points) igejdanen i yelha ad tḍefred ilmend n ttiɛad-a n wass n 29 n mayu-ya.

Senɣes taɣuri tesgunfeḍ cwit: Yettuneḥsab ɛeyyu gar yiɛdawen imenza n win ara yesɛeddin akayad. Imi aneggaru-ya ilaq ad yesɛu akk tizemmar n wallaɣ-is bac ad d-yefka kra. Ihi ur ḥerres ara iman-ik tura mi d-yettqarab ttiɛad. Mara d-imazal ssmana xemmem ugar ɣef useglullef (concentration) wala ɣef tɣuri.

Ečč akken ilaq tesbuḥriḍ allaɣ-ik: Deg kraḍ n yimalasen i d-yeqqimen, tzemreḍ ad tgeḍ aṭas n tɣawsiwin ara ak-inefɛen. Gar-asent tagella iwatan akken ad ijhiden wallaɣ-ik ed tfekka-k i wass-nni, akked tigawin n uttfaci am tuffɣiwin i ugama, aqesser ed yimdukkal…atg. Annect-a akk d ayen ara yessifsusen taɛkemt ma teẓẓay fell-ak.

Tigzi n usteqsi d azgen n tririt: Ama tjerrbeḍ yakan asɛeddi neɣ d amaynut i termit-a (expérience). Tella yiwet n tɣawsa i tlemdeḍ seg wass mi tkecmeḍ aɣerbaz; ur ilaq maḍi ad teǧǧeḍ attqelleq ad ak-yawi, ama tura neɣ deg tzeqqa n usɛeddi. Aṭas n yimussnawen n tnefsit i d-yeqqaren lemmer ad yesseɣleb uqcic ɣef uttqelleq i t-yettḍurrun, yezmer ad yernu ad d-yefk azgen n wayen i d-yefka yakan. Ihi teẓriḍ amek ilaq ad turareḍ nnuba-k! Tebbet kan allaɣ-ik tettekleḍ ɣef yiman-ik ed wayen akken tɛetbeḍ merra!

M. X.

Aɣmis n Yimaziɣen (Dépêche de Kabylie), mayu 2016.

Ɣer daɣen: Amek ara d-awiɣ akayad n BAC?