Yewwi usaru “aẓeṭṭa ” kraḍ n warrazen di tmurt n Lhend

Kraḍ n warrazen i d-yewwi usaru ” Aẓeṭṭa ” deg wayyur n mayyu yezrin, si tmurt n Lhend, ilmend n  tfaska tagreɣlant Brahet n usaru igerrzen.

Ad d-nesmekti belli, asaru-ya, i yettwarun s tmaziɣt, d Mass Ǧamal Baca i d amsuffeɣ-is (réalisateur), d netta i yuran asinaryu-ines daɣen. Yuɣ lḥal d win yessawḍen yewwi-d kraḍ n warrazen di yiwet n tfaska i d-yellan seg 10 armi d 12 mayyu yezrin. Arraz n usaru igerrzen, win n uwelleh n tugna yufraren ( meilleure direction de la photo ), akked win n turart timgerrezt n tmeṭṭut ( la meilleure interprétation féminine ).

Niqal uraren-t deg useggas n 2022, asaru-a yettmaslay-d ɣef wansay seg wansayen-nneɣ iqburen i mazal ṭṭfent deg-s kra n tlawin-nneɣ i yeẓran azal-is.
Aredmani yewwi-d ɣef uẓeṭṭa d wamek i t-ggarent lxalat, neɣ ɣef yiḥricen akk ansi i d-yettεedday uẓeṭṭa, segmi ara yebdu armi ibedd dayen yessuli.

Ahat iswi amezwaru n umsuffeɣ d aḥraz n wansay-a agerruj i yettwattun di ddeqs n temnaḍin. Seg tama tayeḍ, iswi-s d awelleh n tsutiwin i d-iteddun i wakken ad lemdent ula d nutenti, ad ṭṭfent deg wayen i aɣ-d-ǧǧan yimezwura.

Nessaram-as afud igerrzen i Mass Ǧamal Baca.