Kra n yiwellihen swayes nezmer xersum ad nessenqes seg tmes

Acḥal d anebdu tettεeddi fell-aɣ tmes tgellu s uzegzaw d uquran. Yal anebdu tettkellix-aɣ. D lawan ad netkel ɣef yiman-nneɣ, ur nettraǧu seg ḥedd ad aɣ-iεawen.
Ur nezmir ara ad nessens times ma tecεel, maca nezmer ur tt-nettaǧǧa ara ad tecεel.
Ad d-fkeɣ uksar-a ayen i ttwaliɣ iwulem akken ad nesseḥbiber ɣef yiman-nneɣ seg waɣzen-a n unebdu.

1-Afras.
Yal yiwen ad yexdem igran-is. (iḥerqan/ Tiferkiwin…) i yellan sdat n yixxamen ladɣa. Akken mi ara tecεel tmes ur tettaf ara abrid ɣer yimezdaɣ. Ccɣel-a ad yelhu lemmer ad ilin yiwiziwen deg yal taddart, anida mi ara d-yaweḍ unebdu, ad d-jemεen akk at taddart, ad fersen, ad kksen akk zzibeṛ (inijel, isekla iquranen…) i d-yezzin i yixxamen, imi llant twaculin ahat ur sεin ara wara iqedcen fell-asen.

2- Asizdeg.
Yal taddart tesεa tiddukla neɣ ugar, ma ulac akk, ad d-snulfun, ad ilin yiwiziwen, ad d-gren tiɣri i wat taddart (imi ad qeblen akken ma llan ma ḥsan leqdic ad yili ɣef uḥbas n tmes), sakkin ad εeddin ɣer usizdeg n taddart d wayen i as-d-yezzin _ Tawennaṭ s umata – aya ad yili s ujmaε n yiḍuman, ladɣa: ddjaj (zzǧaǧ), tiqerεatin n plastik (imi ula d plastik yezmer ad tt-yecεel), ad jemεen akk ayen ur nelli n ugama, mačči anagar ddjaj i izemren ad yecεel times, ayen akk i yettarran tafat n yiṭij, yezmer ad tt-yecεel. Aya deg-s d aseḥbiber ɣef twennaṭ, deg-s ad aḥader seg tmes.

3- Asikel.
Yal mi ara d-yekcem unebdu, yelha fell-aɣ ad nessikel (ad neddu, ad neffeɣ) deg teẓgi i yellan tama-nneɣ, aya akken ma nufa kra n tmes ad tt-nessnes uqbel ad texdem tawaɣit. Aya yezmer ad yili s usuddes, wid (tuddar) yesεan tiddukliwin ad nnejmaεen mi ara d-yekcem unebdu, ad d-εellen ahil, yal ass ad ttruḥen yimezdaɣ s nnuba ɣer teẓgi ad sfeqden ma yella kra n tmes i d-iceεlen.

4- Iberdan n teẓgi.
Yal tamnaḍt ad xedmen iberdan n teẓgi i asen-d-yezzin, akken yishil uεeddi ɣur-s ma tella-d kra n tmes, ur yettili ara uεeṭṭel ma wennεen yiberdan, dɣa ad tnes tmes uqbel ad timɣur.

Aya ur yelli d lmuḥal. Yif-it ad nennεettab cwiṭ, wala ma ddant teṛwiḥin-nneɣ d uḥajij n tmes. Yelha ad neḥbes tawaɣit uqbel ma teḍra-d.
Ssarameɣ izen-a ad yaweḍ yal yiwen. Zuzzret ladɣa i tdukkliwin. Rnut-d tiktiwin-nwen akken ad d-naf tifrat i twaɣit bla ma nurǧa ḥedd.

ITRI