Buzeggan: ad tebdu ass-a tfaska n tzizwa d tamemt

I wid iḥemmlen tamemt tagamant, i kunwi i yettḥadaren tazmert-nwen tessnem azal d ubaɣur n tamemt n tzizwa, taddart n Uḥriq taɣiwant n Buzeggan ad awen-d-tefk tagnit i temlilit di teẓrigt tis 9 n tzizwa d tamemt.

Ttiεad-a ad d-yili seg 17 armi d 19 ɣuct 2023, seg 8:00 n tnezzayt armi d 18:00 n tmeddit. Deg-s ad yili wahil d amesbaɣur, gar temziknin n tewsatin (lesnaf) n tamemt yemgaraden sɣur yifellaḥen ara d-yerzun seg ddeqs n temnaḍin n tmurt n Yizwawen, ad ilint daɣen temziknin n teɣrasin, tid n tqendyar n leqbayel, lfeṭṭa d wayen-nniḍen.

Akken yetturaǧu am teẓrigin yezrin, ad d-yili wawal neɣ d isaragen ɣef urebbi d uḥraz n tzizwa, d wamek ara d-tessuffɣeḍ tamemt tagamant ifazzen.
Seg tama-tayeḍ, akken uɣen tanummi yemḍebbren, ula d arrac imecṭaḥ ttaken-asen amur-nsen deg leqdicat adelsanen.

Ihi d ttiεad s wazal-is,  ama i win yebɣan ad yessin ɣef tzizwa d tamemt, neɣ i tukksa n ṭṭiq d umbadal n tektiwin, ama i win yebɣan ad d-yaɣ tamemt taḥrurt.