Ahil n teẓrigt tis 19 n tfaska n Udrar n Fad, d tajmilt i Mhenni Xalifi

Akken i nuɣ tannumi tettili-d deg yal aseggas di tɣiwant n Ayt Smaεel neɣ At Udrar n Fad tfaska n tmedyezt d tajmilt i umaru Dda Lmulud At Mεemmer. Di tfaska-ya terran tajmilt daɣen i wudem seg udmawen i d-yefkan i yidles-nneɣ, i yekkan deg usnerni d uḥraz n tutlayt-nneɣ.
Dɣa di teẓrigt-a tis 19 ad as-tuɣal tejmilt i umaru, amedyaz, anaẓur, ameɣnas, aneɣmas Mhenni Xalifi talwit i yiɣsan-is.
Mhenni Xalifi i d-tefka temnaḍt n Ayt Smaεel i yessalin ccan d wazal n temnaḍt-agi s wayen akk yura d wayen yeqdec, ass-a d nnuba-nneɣ nekkni ad as-nerr tajmilt.

Ilmend n waya, d ahil d amerkanti i d-heggan yemḍebbren n tdukkla tadelsanh adrar n Fad.
Ass amenzu, seld taldayt tunsibt n tfaska, ad d-tili terza ɣer uẓekka n Mhenni Xalifi. Syin akkin d asarag askasi ɣef tudert-taseklant n Mhenni sɣur Massa linda Ouatah, Massa Khalifi Sabrina akked Mass Mouaissi. Ad d-yedfer asarag-a umsizwer n tmedyezt akked win n tullist.

Ma yella d ass wis sin, ad yili deg-s umsizwer n tmedyezt, asarag askasi ɣef Dda Lmulud sɣur Mass Amaoui Mehmoud, tanemselt ɣef tira n tullist sɣur Dda Ɛellaoua Rabḥi, di taggara ad kfun ahil n wass s ugni n tiliẓri n BRTV.

Deg ass aneggaru, ad tili tecki n warrazen, ma deg yiḍ d ttiεad i wid iḥemmlen amezgun.
Nessaram-asen afud igerrzen.