Tajmilt i Yasmin Cenan d wid akk yemmuten deg unebdu aberkan

Anwa deg-neɣ ur necfi i tegnatin-nni i yesrehben ulawen-nneɣ, anwa i izemmren ad d-yini belli ffɣent yir tewlafin i nedder 3 iseggasen ɣer deffir. D anebdu aberkan i yewwin tirwiḥin timellalin, d anebdu aberkan i yesberken iḥulfan n kra win i as-d-yecfan.

Yasmin Cenan (Yasmine Chenane) d yiwet n tlemẓit i yesεan 33 n yiseggasen, seg taddart n Tewrirt Mimun n At Yenni, d tasfelt n yijajiḥen n tmes iḥuzan tamurt n leqbayel deg unebdu n 2021, neɣ anebdu aberkan i yessberken tuddar-nneɣ, i yesluɣen ulawen-nneɣ.

Yasmin d tilemẓit i yuklalen tajmilt tageεmirt imi tessaweḍ tsellek-d azal n 3 n tlawin d 4 n warrac seg lmut s yijajiḥen n tmes. Nettat i ixemmem ɣef wiyaḍ tsellek-iten-id uqbel ad txemmem ɣef yiman-is, d tudert-is i tefka d tasfelt i tmes tamcumt i yeglan s terwiḥt-is zeddigen. Ayagi i  wakken ad idiren watmaten-is d testmatin-is.

Yasmin d amedya ɣef tebɣest i yesεa myal yiwen neɣ yiwet i yeddren taswiεt-nni n tugdi.

Ass-a, am Yasmin am wid akk yemmuten, ad qqimen deg umezruy i lebda, ad ten-id-nettmektay s wayen lεali ɣas ulamma zzant tasiwin-nneɣ fell-asen. Meεna ruḥen d izedganen d ineglusen ur nebni ɣef wayen i asen-yeḍran.

Sgunfut di talwit, ad teqqimem i lebda deg ulawen-nneɣ.