Ferεun: yenɣa yiwen n urgaz uletma-s d teyyawt-is

Yeḍra-d ussan-a iεeddan ubaxix deg taddart n Icekkaben, tamnaṭ n Ferεun, mi tettwanɣa tmeṭṭut Raḥima d yelli-s Manal sɣur yiwen n urgaz i yellan d gma-s n tmeṭṭut-a.

Ɣef leḥsab n wamek i d-ffɣen isallen, tettuɣal tedyant-a ɣer 9 meɣres iεeddan. Rnu tesεa assaɣ akked wayen mu qqaren “areqqi” neɣ “ruqya” s teεrabt. Dɣa s yelli-s n Raḥima nniḍen, i iselken seg lmut, i ssawḍen yiǧadarmiyen ṭṭfen win yenɣan.

Ilmend n tedyant-a, yennulfa-d Ugraw n tallelt i twacult n urgaz n Raḥima. Di Facebook, yella usebter i waya s yisem « I Manal akked yemma-s ».

Yenna-d Ugraw-a : « Ur nqebbel ara ad d-ḍerrunt tedyanin am tidak ɣur-neɣ war ma neẓra. Nettkel ɣef ccɣel n teɣdemt akken ad teḥkem s uεaqeb ilaqen ɣef tmenɣiwt-a n sin n yimdanen ».

Ad d-nesmekti d akken ass n lǧemεa 02 yebrir, ad tili yiwet n tikli n tsusmi ɣef yiman n tmeṭṭut-a Raḥima d yelli-s Manal. Rnu-as daɣen tebda yiwet n tbezzart di internet i ujmaε n yidrimen s wayes ara sεeddin taluft di ccraε.